De Sineeske toarnekster (Lanius sphenocercus) is in Eastaziatyske fûgel út 'e famylje fan 'e wurgerfûgels (Laniidae) en it skift fan 'e sjongfûgels (Passeriformes).
Skaaimerken De Sineeske toarnekster is in tige grutte (31 sm) fertsjintwurdiger fan 'e wurgerfamylje; it is de grutste soarte yn it skaai Lanius. It fearrekleed bestiet út in grize boppeside, swartwite wjukken en sturt, in swart eachmasker en in ljochte ûnderside. Opfallende skaaimerken binne de wite wynbraustreek en in dúdlike wite wjukstreek. De middelste sturtpinnen binne swart, wylst de bûtenste sturtpinnen folslein wyt binne.
De mear súdlik foarkommende reuzetoarnekster (Lanius giganteus) — dy't foarhinne (en somtiden noch) as ûndersoarte fan 'e Sineeske toarnekster beskôge waard — is grutter as de Sineeske toarnekster en hat in donkergrize boppeside. Boppedat ûntbrekke by dizze soarte de wite wynbraustreek en de wite tekening op 'e sekundêre wjukfearren.
Fersprieding en taksonomy De Sineeske toarnekster komt foar yn in gebiet fan East-Mongoalje yn eastlike rjochting oant Súdeast-Sibearje, Noard- en Noardeast-Sina (Binnen-Mongoalje, it noardeasten fan Liaoning en mooglik Heilongjiang en Jilin, oant yn it suden yn Gansu, Shaanxi en Shanxi) en op it noardlike en sintrale diel fan it Koreaanske Skiereilân. Winterdeis trekt de fûgel benammen nei East- en Súdeast-Sina en Koreä. De soarte wurdt trochstrings as monotypysk beskôge.
Hâlden en dragen De Sineeske toarnekster libbet yn steppes, strûkbosken en healwoastinen, mar ek oan wâldrânen en yn beammen by rivieren lâns. De twa nau besibbe foarmen binne ekologysk strikt skieden troch hichteferskillen: de reuzetoarnekster (Lanius giganteus) komt foar op of boppe de beamgrins op hichten tusken 3.000 en 5.200 meter, wylst de Sineeske toarnekster (de nominaatfoarm) op folle legere nivo's libbet, tusken 200 en 1.100 meter boppe seespegel.
Lykas oare wurgers fiedt de Sineeske toarnekster him mei ynsekten, lytse fûgels en lytse sûchdieren. Hy fangt dizze troch yn 'e loft te hingjen of troch him fan in hege sitplak ôf – lykas in beam, strûk of elektrisiteitslieding – nei ûnder te stoarten. Ynformaasje oer it brieden is allinnich ôfkomstig út Súdeast-Ruslân; dêr fynt it aailizzen tusken de twadde helte fan april en begjin juny plak en fleane de jongen yn juny út.
Status en bedrigingen De Ynternasjonale Uny foar it Behâld fan 'e Natuer (IUCN) klassifisearret de populaasje fan 'e Sineeske toarnekster as net bedrige (Least Concern, LC), mei in stabile populaasjetrend.
Kategory:Fûgelsoarte Kategory:Wurger Kategory:Lânseigen fauna yn Sina Kategory:Lânseigen fauna yn Súd-Koreä Kategory:Lânseigen fauna yn Noard-Koreä Kategory:Lânseigen fauna yn Mongoalje Kategory:Lânseigen fauna yn Sibearje