Pieter Helfrich (Mullum, 11 april 1895 - Harns, 30 maart 1980) wie in Frysk keatser.
Helfrich helle 376 punten foar it ivich keatsklassemint. Yn 1929 wûn er mei Taede Zijlstra fan Mitselwier en Ids Jousma fan Dokkum foar de earste kear de PC. Twa jier letter wûn er foar de twadde kear de PC, dy kear mei Taede Zijlstra en Klaas de Jager, Pieter Helfrich waard ta kening útroppen.
Helfrich hie yn syn deistich libben in swier berop. Hy wurke fan syn tolfde jier ôf by de boer en dêrnei gâns jierren, dei út dei yn, by it hânmjittich ôfgraven fan de Mullumer terp, dy't op guon plakken wol sân meter heech wie. It iennichste foardiel dêrfan wie dat er sterke earms krige. Sels moarns betiid, fier foar it begjin fan in keatspartij, wie er dêr al dwaande om dochs mar in part deilean te fertsjinjen. Hy ferhuze fan Mullum nei Winaam en yn 1928 nei Harns. Dêr gie er oan it wurk by de gemeentereiniging, in wat minder swier berop as terpôfgraver.
By it publyk kaam er net altyd sympatyk oer omdat er te agressyf fûn, te min gefoel foar humor hie en er in nederlaach min akseptearje koe. Yn 1925 waard er sels foar in moanne skorst yn ferbân mei "it staken fan it spul". Syn lêste punten bemachtige er yn 1938. Nei syn aktive karriêre as keatser hold er foar de keatsferiening Eendracht, de gersmatte yn poerbêste kondysje en holp er by de opbou fan de tribune.
Pieter Helfrich ferstoar op 30 maart 1980 yn de âldens fan 84 jier.
Prizen 1921 - de Bond 5e priis 1924 - PC 2e priis 1927 - de Bond 2e priis 1928 - de Bond 1e priis 1929 - PC 1e priis 1930 - de Bond 1e priis 1931 - de Bond 1e priis 1931 - PC 1e priis 1932 - de Bond 1e priis 1933 - PC 4e priis
Kategory:Frysk keatser Kategory:PC kening Kategory:Persoan berne yn Mullum Kategory:Persoan stoarn yn Harns Kategory:Persoan berne yn 1895 Kategory:Persoan stoarn yn 1980