Boeranofskije Baboesjki (Russies: Бурановские бабушки, Oedmoerts: Брангуртысь песянайёс, Brangoertis pesjanajos, Afrikaans: Grootmoeders uit Boeranowo) is 'n Russiese etnopop-sanggroep uit Boeranowo, 'n dorp in die outonome Republiek van Oedmoertië. Die groep bestaan uit altesaam agt bejaarde dames, waarvan ses in Maart 2012 die eerste plek in die Russiese nasionale finale rondte van die Eurovision-sangfees 2012 behaal het wat deur die nasionale Russiese televisiekanaal Rossija 1 georganiseer is.
Hulle het Rusland by die Eurovision-sangfees 2012 in die Azerbeidjanse hoofstad Bakoe met hul liedjie Party For Everybody (Come On and Dance) verteenwoordig. Boeranofskije Baboesjki het in die nasionale kleredrag van Oedmoertië met gevlegte basskoene opgetree en in Oedmoerts, 'n Fins-Oegriese taal, en Engels gesing. Die liedjie begin as Oedmoertse volkswysie voordat die sangeresse na moderne popmusiek en dansritmes oorskakel. Volgens die groep sou hulle die geld, wat hulle met hul treffer verdien het, gebruik vir die renovasie van hul dorpskerk.
Geskiedenis Die groep van bejaarde sangeresse het in 2008 bekendheid verwerf met hul gemengde repertoire van Oedmoertse volkswysies en popmusiek. Hulle het onder meer hul eie weergawes van bekende poptreffers soos The Beatles se Yesterday en The Eagles se Hotel California in Oedmoerts gesing. In 2010 het die groep die derde plek in die nasionale finale rondte van die Eurovision-sangfees behaal.
Eksterne skakels Media Eurovision.tv: Buranovskiye Babushki Buranovskiye Babushki (Audio)
Kategorie:Russiese musiekgroepe