Die skeldnaam tokkie word in Nederland as pejoratief gebruik vir mense uit die laer klasse wat dikwels beskou word as geneig tot asosiale gedrag, en meer algemeen vir 'n persoon met oorheersend negatiewe eienskappe. Dit is vergelykbaar met die Engelse chav, die Skotse ned, die Suid-Afrikaanse zef en die Australiese eshay. In die spreektaal word die term ook as bywoord gebruik.
Die begrip word feitlik net in die Nederlands van Nederland gebruik. In die Belgiese Nederlands word deurgaans die term 'marginaal' in plaas van 'tokkie' gebruik; die twee terme word dikwels as sinonieme van mekaar beskou.
Herkoms Die woord 'tokkie' is afgelei van die Joods-Nederlandse van Tokkie. Die term het ontstaan toe die Amsterdamse gesin Ruijmgaart-Tokkie (bekend as 'die Tokkies') in 2004 en 2005 op die Nederlandse televisie uitgebeeld is en baie negatiewe aandag gekry het weens hul asosiale gedrag, onder meer in die dokumentêre reeks Familietrots van die destydse Nederlandse openbare omroeper IKON. Die gesin het in 'n mate ooreengekom met die fiktiewe Flodder-gesin uit die Nederlandse komediefilm van dieselfde naam uit die 1980's en 1990's.
Van hierdie gesin dra egter net die moeder, Hanna Tokkie, werklik die van Tokkie. Die res van die gesinslede dra die van Ruijmgaart, na die vader, Gerrie Ruijmgaart, al is die hele gesin gesamentlik as 'tokkies' geïdentifiseer. 'Pa Tokkie', Gerrie Ruijmgaart, is in April 2026 op 73-jarige ouderdom oorlede.
Openbare gebruik Die gesin Ruijmgaart-Tokkie was nie tevrede daarmee dat die familienaam as pejoratief gebruik word nie; 'tokkie' het daarby uitgegroei tot 'n gangbare term in die Nederlandse taal. In April 2009 het hulle 'n skadevergoeding van 50 000 euro van Van Dale Uitgevers geëis omdat die woord 'tokkie' in die Van Dale-woordeboek opgeneem is, waarin dit met asosiale gedrag geassosieer word.
In 2016 het eerste minister Mark Rutte die begrip 'tokkie' ook meermale gebruik om die mense te beskryf wat Sylvana Simons daardie jaar op 'n gewelddadige en rassistiese wyse op die internet uitgeskel het. Daarop het die Nederlandse amateurgeskiedkundige Lion Tokkie, wat geen familie van die gesin Ruijmgaart-Tokkie is nie, 'n klag aan Rutte gestuur omdat hy hom deur Rutte se gebruik van die term gekwets gevoel het. Die eerste minister het vervolgens 'n brief aan Lion Tokkie gestuur waarin hy om verskoning gevra en begrip getoon het. Rutte het in die brief belowe dat hy die term voortaan nie meer in daardie konteks sou gebruik nie.
Verwysings
Eksterne skakels
Kategorie:Nederlands Kategorie:Sosiale groepe