Die Nigeriese Krieketfederasie (Engels: Nigeria Cricket Federation) is die bestuursliggaam wat krieket in Nigerië beheer. Die beheerliggaam is in 1957 gestig en in Abuja gesetel. Sedert 2002 verteenwoordig dit Nigerië by die Internasionale Krieketraad (IKR) as ’n assosiaatlid en ook by die Afrikakrieketvereniging (Africa Cricket Association, “ACA”).
Geskiedenis Die Nigeriese Krieketfederasie het in 1957, voor Nigerië se onafhanklikwording, ontstaan met die samesmelting van die in 1932 gestigte Nigeriese Krieketvereniging (Engels: Nigeria Cricket Association, NCA) vir Europeërs en die in 1933 gestigte gelyknamige beheerliggaam vir Afrikane onder dieselfde naam wat in 1951 nog los verbonde was met aparte takke vir albei bevolkingsgroepe. In 2002 het dit ’n assosiaatlid van die Internasionale Krieketraad (IKR) geword. In dieselfde jaar het hulle by die Afrikakrieketvereniging (Africa Cricket Association, “ACA”) aangesluit. In 2006 het die beheerliggaam sy huidige naam verkry.
Taak Die Nigeriese Krieketfederasie organiseer verskeie nasionale spanne, insluitend Nigerië se nasionale seniorkrieketspan vir mans (Yellow Greens), vroue en jeug. Hulle is ook verantwoordelik vir die bestuur en organisasie van T20I-reekse teen ander spanne, en vir die reëling van internasionale wedstryde tuis. Daarbenewens is die Nigeriese Krieketfederasie verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Nigeriese span.
Daarbenewens bestuur die beheerliggaam kinder- en jeugkrieket in Nigerië. Net soos ander krieketlande beskik Nigerië oor ’n o/19-nasionale span wat aan die o/19-krieketwêreldbeker deelneem.
Die beheerliggaam reël ook die plaaslike kompetisies. Die belangrikste krieketliga in Nigerië is die Nigerian Super League.
Kenteken Die Nigeriese nasionale krieketspan se bynaam is Yellow Greens. Die Nigeriese Krieketvereniging se kenteken toon ’n skild met die gestiliseerde uitbeelding van beide die Niger- en Benueriviere se rivierloop in Nigerië en die letters NCF met die belettering Nigeria Cricket Federation. Die Nigeriese Krieketfederasie is by die Nasionale Stadion in Abuja gesetel.
Verwysings
Eksterne skakels Amptelike webwerf van die Nigeriese Krieketfederasie
Kategorie:Krieket in Nigerië Kategorie:Krieketbeheerliggaam Kategorie:Internasionale Krieketraad