Emmy Jensen (* 2. August 1931 as Emmy Oehlert op Pellworm; † 5. Mai 2025 ok op Pellworm) weer een nordfreesische Buurfru, Hobbymalerin, Frömmenföhrerin un Schrieverin.
Leven un Wirken Emmy Jensen worr an’n 2. August 1931 op Pellworm boren un is dor ok tosamen mit een jüngeren Broder opwussen. Ehr Öllern weern Bäcker, se harrn een Laden op de Insel un nich veel Tiet för de Kinner. De eersten Johrn güng Emmy op Pellworm to School. Wiel se good lehren kunn, wessel se op de högere School na Rendsborg. As de School in Tweten Weltkrieg tomoken müss, güng dat för Emmy trüch an de Pellwormer School.
As junge Deern dreep se bi een Wattwannerung mit een Grupp junge Lüüd op Fritz Jensen. De beiden wurrn een Poor, heiroteten un övernahmen de Buurstell von Fritz sien Öllern in den Süderkoog op Pellworm. Se kreegen dree Kinner. Neven de Arbeet in Huus un Hoff funn Emmy Tiet för ehr Hobby, dat Malen. Mit de Johrn keemen dor ümmer mehr Biller tosamen, de se bi Utstellungen op Pellworm un op Fastland vörstellte. De Motive vun ehr Biller harrn veel mit den Himmel un dat wiede Kieken op de Insel to doon. So keem dat, dat Feriengäste ehr een Holtschild mit den Nökelnaam Himmelsmalerin schenkt hebbt. Emmy dee veel dorför, de Lüüd för Pellworm to begeistern. Geern wies se ehr watt vun de Insel, vertell Geschichten ut ole Tieden und geev Plattdüütsch-Kurse. Se bröch ok twee plattdüütsche Dööntjesböker rut, ut de se bi Veranstaltungen watt vörlesen dee. Mennigmol is Emmy vun de Medien anfraagt worrn, wenn Sendungen öwer Pellworm dreiht wurrn. So weer se to’n Bispeel 2018 in dat WDR-Reisemagazin Wunderschön! to sehn un to hören. Ok hett Tamina Kallert – de Moderatorin vun de Sendung – ehr in dat Book Mit kleinem Gepäck: Wunderschöne Geschichten vom Reisen opnahmen. In den Reiseführer Marco Polo – Reiseführer Föhr, Amrum, Pellworm, Nordstrand, Halligen vun Barbara Dobrick warrt op Emmy un ehr Biller henwiest.
Emmy Jensen starv an 5. Mai 2025 op den Dag acht Johr na ehren Mann Fritz (1923–2017). Begraven liggt se op den Karkhoff bi de Pellwormer Nie Kark.
Böker Ole Döntjes vun Pellworm. Mit mien Biller vun Pellworm. Pellworm-Verlag Borchard, Pellworm 2001, ISBN 3936017018. Geschichten und Riemels von Pellworm. Pellworm-Verlag Borchard, Pellworm 2007.
Kiek ok bi List vun plattdüütschen Schrieverschen
Weblenken
Nawiesen
Kategorie:Fru Kategorie:Börger von Düütschland Kategorie:Noordfreesland Kategorie:Schriever Kategorie:Maler Kategorie:Boren 1931 Kategorie:Storven 2025