Lerina Erasmus (20 Augustus 1946 – 20 Augustus 2018) was 'n Suid-Afrikaanse aktrise en skrywer. Sy het die rol van Rusty in die SAUK-sepie Orkney Snork Nie vertolk. Sy is ook die outeur van die Mannheimsage-trilogie.

Lewe en werk Lerina Erasmus is in Namibië gebore as die enigste kind in die gesin. Haar pa, Pieter, was ’n boekhouer en ouditeur en die gesin verhuis gereeld as hy van werk verander. Haar ma, Vera, het ’n groot verbeeldingskrag en dramatiseer en maak stories op vir die kind, wat haar van kleinsaf stimuleer. Sy bring haar eerste jare op skool in Namibië deur, waarna sy ook skoolgaan in Lyttelton, Laerskool Oost-Eind in Pretoria en Klerksdorp. Hulle trek dan terug Namibië toe, waar sy haar hoërskooljare voltooi.

Sy bestudeer Drama aan die Universiteit van PretoriaEsat: http://esat.sun.ac.za/index.php/Lerina_Erasmus saam met tydgenote soos Katinka Heyns, Sandra Prinsloo, Neels Coetzee en George Ballot en verower hier die Ludwig Binge-toekenning. Hierna raak sy bekend as aktrise wat vir die streekrade optree in teaterproduksies soos Elektra, Antigoné en Medea, asook in televisiereekse soos Dokter Dokter en Drama Drama. Sy speel ook in die rolprent Dit was aand en dit was more, wat deur Franz Marx geregisseer is, en die rolprente Die drie Van der Merwes en The fifth season.

Verder vertolk sy verskeie rolle in vervolgverhale en dramas oor die radio, waaronder die gewilde Wolwedans in die skemer wat oor Springbokradio uitgesaai is. Later studeer sy aan die Max Reinhardt-Instituut in Oostenryk. Sy is vroeg in die sewentigerjare van die twintigste eeu getroud met Günther Alfred Schmikal, ’n Oostenrykse ingenieur en hulle woon in Parkwood in Johannesburg.Rademeyer, Alet. Lerina se huis is ’n vesting met ryk Oostenrykse fleur. Plus, 30 Januarie 1998 Hulle het ’n seun, Stefan-Pieter.

Sy is op 20 Augustus 2018 in Johannesburg in die ouderdom van 71 jaar oorlede.

Skryfwerk

Radioreekse Na die geboorte van hulle seun spits sy haar toe op skryfwerk, wat uitloop op talle radioreekse, soos Die Mannheimsage, My hartjie my liefie, Noodskoppelmaai, Solitaire en Vriendinne. Sy word dan versoek om Die Mannheimsage vir televisie te verwerk, met die oog op die Johannesburgse eeufeesjaar in 1986.

Radiosondergrense saai haar radiodrama Die September-insident uit, waarin twee mense met totaal verskillende agtergronde en van uiteenlopende gemeenskappe deur onvoorsiene omstandighede bymekaar gebring word.

Televisiereekse Daarna skryf sy ook die televisiereeks Moordspeletjies en is vir ’n tyd verantwoordelik vir die hoofstorielyn van die sepie Glaskastele. Die televisiereeks Dot & Kie is ook uit haar pen.

Haar eerste vollengte draaiboek is While the music lasted (oor wit, swart en bruin dansers wat desperaat probeer om ’n kompetisie te wen in apartheid Suid-Afrika) en sy skryf ook die draaiboek van Die Leliemoordenaar.

Mannheim-saga Sy gee self die drie boeke in die Mannheim-sage uit en doen baie navorsing na die geskiedenis van die goudvelde in Transvaal.Nieuwoudt, Stephanie. Geskiedenis van Goudstad lê Lerina naby aan die hart. Plus, 30 Januarie 1998 In Fortuinsoekers word die verhaal vertel van die ontdekking van goud in Johannesburg en die stryd van die kunssinnige en eksentrieke mynbaas Karel Mannheim en Kit Malloy om die hand van Deborah von Albein.Blom, André. Insig, Mei 1998

In Goudkewers loop Johannesburg gevaar om ’n spookdorp te word, omdat die goud deurspek is met piriet, wat nie deur konvensionele metodes verwyder kan word nie. Die delwers probeer dieper delf (en word so die goudkewers) om te kyk of die dieper ertslae nie van beter gehalte is nie. Die Jameson-inval en Anglo-Boereoorlog neem feitlik al Karel Mannheim se tyd in beslag. Deborah word gedwing om die bestuur van die goudmyne oor te neem in haar man se afwesigheid, terwyl Kit Malloy steeds teenwoordig is en sy moet kies tussen hom en haar verpligtinge.

Die vervolmaking van die sianiedproses skep ’n goue era vir Johannesburg en die pioniere word Goudbaronne. Karel Mannheim probeer die liefde van sy vrou herwin, maar die oorlog het diep letsels op haar gelaat. Hulle seun en Kit Malloy se dogter raak verlief en die familievete word voortgesit.De Kock, Helene. Plus.

Eerbewyse In 2009 word sy ingelyf in die Foxwood-landgoed in Houghton se Tuin van Beroemdes.Odendaal, Thys. Lerina Erasmus in Tuin van Beroemdes vereer. Plus, 27 November 2009

Publikasies

Radioreekse Van die radioreekse wat sy geskryf het sluit in: Die Mannheimsage (later ook op TV uitgesaai) Hartjie my Liefie Noodlotskoppelmaai Solitaire en Vriendinne

Boeke Die Mannheimsage-trilogie vertel die verhaal van die eerste jare van Johannesburg, die ontstaan van goudmynbedryf, die verwoestende oorlog en die opbou van Johannesburg daarna. Die boeke is: Die Fortuinsoekers, 2007, Die Goudkewers, 1998, Die Goudbaronne, 2006, Van haar ander boeke: Moordspeletjies Glaskastele (hoofstorielyne) Die Leliemoordenaar, 2016,

Aktrise

Teaterproduksies Van die teaterproduksies waarin sy gespeel het: Elektra Antigoné Medea

TV-optredes Sy verskyn in die volgende TV-programme:Imdb: http://www.imdb.com/name/nm3464901/ Orkney Snork Nie, SAUK as Rusty Dokter-Dokter, SAUK Drama-Drama, SAUK

Verwysings

Boeke Van Coller, H.P. (red.) Perspektief en Profiel Deel I. J.L. van Schaik-Uitgewers Pretoria Eerste uitgawe 1998

Tydskrifte en koerante Anoniem. Trippelgoud vir Lerina. Plus, 5 Julie 2006 De Kock, Lochner. Lerina: Diamant met vele fasette. Rapport-Tydskrif, 21 November 1999 Fourie, Corlia. My plekkie in die son. Rooi Rose, 23 Junie 1999 Odendaal, Thys. Sage in ’n nuwe baadjie. Beeld, 24 Oktober 2007 Roos, Martjie. Lerina voltooi die Mannheim-sirkel. Rapport, 9 Julie 2006 Snyman, Mariette. Ter wille van die liefde. Rooi Rose, Oktober 2006

Ander verwysings

Kategorie:Suid-Afrikaanse aktrises Kategorie:Suid-Afrikaanse aktrises van die 20ste eeu Kategorie:Suid-Afrikaanse skrywers Kategorie:Geboortes in 1946 Kategorie:Sterftes in 2018