Let Them All Talk is 'n Amerikaanse komediedramarolprent van 2020 wat deur Steven Soderbergh geregisseer is. Die draaiboek is deur Deborah Eisenberg en die hoofakteurs is Meryl Streep, Dianne Wiest, Candice Bergen, Lucas Hedges en Gemma Chan.

'n Groot deel van die dialoog is deur die akteurs geïmproviseer en Soderbergh het die filmwerk in natuurlike lig en met min toerusting aan die boord van die Queen Mary 2 gedoen.

Die rolprent is op 10 Desember 2020 deur HBO Max in die VSA uitgereik en het goeie resensies gekry.

Rolverdeling

Meryl Streep as Alice Hughes, 'n skryfster, Tyler se tante en Roberta en Susan se vriendin Candice Bergen as Roberta, Alice en Susan se vriendin Dianne Wiest as Susan, Alice en Roberta se vriendin Gemma Chan as Karen, Alice se agent Lucas Hedges as Tyler Hughes, Alice se nefie John Douglas Thompson as dr. Mitchell Christopher Fitzgerald as Eddie, Susan se seun Daniel Algrant as die gewilde raaisel- en rillerskrywer Kelvin Kranz

Storielyn

Alice Hughes is 'n Pulitzerprys-bekroonde skrywer wat aan haar jongste manuskrip werk, wat haar uitgewer hoop 'n vervolg sal wees op haar bekendste werk, You Always/You Never. Alice moet 'n letterkundeprys in Brittanje ontvang, maar kan weens haar gesondheid nie vlieg nie, wat daartoe lei dat haar agent, Karen, voorstel sy vaar met die Queen Mary 2. Alice nooi haar nefie, Tyler, om haar tydens die reis by te staan, asook haar universiteitsvriendinne Roberta en Susan, met wie sy kontak verloor het. Alice en Roberta het 'n moeilike verhouding wat spruit uit Roberta se oortuiging dat Alice besonderhede oor haar in You Always/You Never gebruik het, iets wat Roberta meen haar lewe ontspoor het. Sonder Alice se medewete sluit Karen by hulle op die skip aan in die hoop om besonderhede oor Alice se nuwe boek uit te vind.

Op die skip bou Karen 'n vriendskap met Tyler op en gebruik hom om inligting uit Alice te kry. Alice vertel Tyler dat die boek handel oor "om vir 'n tweede keer weerlig in 'n bottel te probeer vang", wat moontlik impliseer dat dit 'n vervolg op haar vorige werk sal wees. Sy bestee die meeste van haar tyd aan skryf en neem net pouses om te eet en te swem. Roberta probeer welgestelde mans aan boord lok, terwyl Susan met Kelvin Kranz, nog 'n skrywer, begin omgaan; Kranz skryf gewilde raaisel- en rillerboeke, wat Alice geringskat. Kranz ken ook vir Karen en raai haar aan om nie in die besonderhede van Alice se werk te krap nie.

Roberta probeer met Alice praat om 'n verskoning en erkenning te kry vir Alice se gebruik van besonderhede uit haar lewe – iets wat Alice nog nooit erken het nie – maar die twee slaag nie daarin om alleen te gesels nie. Alice loop Tyler en Karen saam raak en verneem dat Tyler romanties in Karen belangstel. Tyler en Karen gaan eet saam, waar Tyler se romantiese toenaderings afgekeur word. Alice nooi Karen om saam met die viertal aandete te geniet, waar die spanning tussen Alice en Roberta tot 'n hoogtepunt kom nadat Karen haar oor die nuwe boek uitgevra het. Hulle word onderbreek deur Susan, wat albei daarvan beskuldig dat hulle selfsugtig is en aan hulle bitterheid vasklou. Alice besluit om haar boek van die rekenaar te wis.

Nadat hulle die skip verlaat het, voer Alice en Roberta 'n gesprek oor hulle vervreemding. Roberta vertel vir Alice dat sy haar van die lewensbesonderhede sal voorsien wat Alice nodig sou hê om 'n vervolg op You Always/You Never te skryf, maar dat sy in ruil daarvoor 'n deel van die wins wil hê. Alice verwerp die aanbod en hulle gaan uiteen, met Roberta wat vir Alice sê: "Ek het jou liefgehad toe jy nog Al was." Daardie aand begin Alice aan 'n nuwe skryfprojek werk.

Die volgende oggend groet 'n man wat Tyler gereeld uit Alice se kamer op die skip sien kom het, hom by Alice se deur. Hy onthul dat hy dr. Mitchell, Alice se persoonlike geneesheer, is en dat Alice gedurende die nag aan diepaartrombose gesterf het; dr. Mitchell was aan boord van die skip om haar elke dag met 'n bloedverdunningsmiddel in te spuit.

Tyler, Roberta en Susan besoek die graf van die 19de-eeuse skrywer Blodwyn Pugh, soos Alice wou hê hulle moes doen. Terug in Amerika gee Roberta Alice se skryfwerk, wat sy ná Alice se dood uit haar kamer geneem het, aan Karen in die hoop om voordeel daaruit te trek. Karen hou vol dat die werk onvoltooid is en nie gepubliseer kan word nie, maar moedig Roberta se idee aan om 'n boek oor haar lewenservarings te skryf. Susan werk saam met Krantz aan 'n nuwe boek wat geskoei is op 'n idee wat sy aan boord van die skip met hom gedeel het. Tyler ontvang Alice se onvoltooide skryfwerk van Karen en neem dit terug na haar woonstel, terwyl hy terugdink aan 'n toespraak wat Alice op die skip gelewer het waarin sy die bestaan van bewussyn en mense se vermoë om mekaar te beïnvloed, gevier het.

Ontvangs Op Rotten Tomatoes was 88% van 114 resensies positief, met 'n gemiddelde punt van 7,2/10. Die webtuiste se konsensus lui: "Wanneer Steven Soderbergh so 'n talentvolle rolverdeling bymekaarbring, is dit beslis wys om Let Them All Talk te laat praat – en hierdie ligte maar lonende komediedrama voldoen meer as genoeg aan die verwagtinge." Op Metacritic het die rolprent 'n gemiddelde telling van 72 uit 100 ontvang op grond van 31 resensies, wat dui op 'n "algemeen gunstige" ontvangs.

Leah Greenblatt van Entertainment Weekly het die rolprent met 'n A- beoordeel en dit beskryf as "'n geleentheid om twee uur lank te kyk hoe Streep en kie. die beste maak van Deborah Eisenberg se heerlik spitsvondige draaiboek, terwyl Soderbergh – wat ook die kinematograaf is – dit alles in ongenaakbare, stralende lig verfilm."

Verwysings

Skakels

Kategorie:Amerikaanse rolprente