KV4 is 'n grafkelder in die Vallei van die Konings by Thebe, naby die moderne stad Luxor in Egipte. Dit is aanvanklik vir Ramses XI gebou, maar bouwerk is moontlik laat vaar en dit is nie vir hom gebruik nie. Dit is ook moontlik dat Pinedjem I beplan het om die grafkelder oor te neem, maar dat hy ook van die plan afgesien het. KV4 is die laaste grafkelder wat in die vallei gebou is en dit word algemeen beskou as 'n werkwinkel wat gebruik is tydens die aftakeling van die koninklike nekropolis in die vroeë Derde Oorgangstydperk.
Verkenning en uitgrawings KV4 is sedert antieke tye oop en graffiti uit verskillende tydperke getuig van sy gewildheid as 'n vroeë toeristeattraksie. Dit het egter min aandag van geleerdes gekry totdat John Romer dit in 1978-'80 skoongemaak het.
Uitleg en inhoud KV4 is langs KV46 geleë. Dit loop tot meer as 100 meter in die heuwels in en bestaan uit drie stadigaan dalende gange wat na die putkamer lei (hoewel daar geen skag is nie) en twee onvoltooide kamers met pilare. Die laaste kamer, die grafkamer, het 'n diep skag in die middel van sy vloer.
Versierings was teenwoordig aan die raam en kosyne van die buitenste deur en in die eerste gang. 'n Deel van die versierings is in antieke tye beskadig en is later herstel deur Pinedjem I, wat die koning se naam met syne vervang het.
Romer se uitgrawings van KV4 het vyf groepe voorwerpe onthul: Items met hulle oorsprong in KV62 (die grafkelder van Toetankamen). Dit dateer van die tyd toe Howard Carter uitgrawings in KV62 gedoen het.Reeves, C.N., Valley of the Kings: Decline of a Royal Necropolis (Kegan Paul, 1990) pp. 81, 126 Bewyse van Koptiese bedrywighede.Reeves, C.N., Valley of the Kings: Decline of a Royal Necropolis (Kegan Paul, 1990) p. 121 Oorblyfsels van 'n begrafnis uit die 22ste Dinastie, onder meer bene en 'n deel van 'n kis. Gedeeltelike oorblyfsels van verskeie koninklike begrafnisse uit die Nuwe Ryk, soos fragmente van houtpanele en minstens een kis van 'n vroulike heerser uit die 18de Dinastie (moontlik Hatsjepsoet), 'n houer met die Horusnaam van Toetmoses I en Ramses II en begrafnisbeeldjies van Ramses IV.Reeves, C.N., Valley of the Kings: Decline of a Royal Necropolis (Kegan Paul, 1990) pp. 121–122 Fondamentdeposito's van Ramses XI: Dit word verbind met die skag in die grafkamer.
Verwysings
Skakels Theban Mapping Project: KV4
Kategorie:Vallei van die Konings