rechts|duum|Christophe Laporte (2022) Christophe Laporte (* 11. Dezember 1992 in La Seyne-sur-Mer) is en franzöösch Radrennfohrer. 2023 wurr he in’n Straatenradsport Europameester. He gellt as endflinker Klassiker-Spezialist un kunn mit Gent–Wevelgem, Dwars door Vlaanderen un een Deelstreck bi de Tour de France groot Rennen winnen.
Sportlich Loopbahn As Nachwussfohrer is Christophe Laporte för de Clubs Velo Sport Hyerois un AVC Aix-en-Provence fohren, kunn aber kien internatschonale Erfolge recken.
Mit 21 Johren kreeg he af dat Johr 2014 en Verdrag bi dat franzöösch UCI ProTeam Cofidis. In sien tweet Saison wies he mit Rang dree bi dat belgisch Eendagsrennen Le Samyn sien Können un hett mit de Tour de France 2015 sien eerste Grand Tour bestreeden, de he up den 127. Gesamtrang afsluuten dee. An dat Enn’n vun de Saison keem he bi den Grand Prix de Wallonie up den darten Platz, bevör he mit de Tour de Vendée sien eerst Rennen as Profi wunn. In den Johren 2016 un 2017 gung Laporte weer bi de Tour de France an den Start keem dorbi up söben Deelstrecken in’n Sprint in de Top 10. Todem wunn he in 2017 to’n tweeten Mal de Tour de Vendeé.
2018 folg sien bit dorhen spoodriekste Saison. All in dat Fröhjohr wunn he een Deelstreck vun dat Étoile de Bessèges un twee Deelstrecken un de Punktewertung vun de Tour de La Provence. Bi Gent–Wevelgem verpass he as Veert knapp dat Podium, wunn aber bi den Tro Bro Leon, en franzöösch Eendagsrennen, dat över mehrere Schotter-Afsnitte führen dee. Nah jewiels een Deelstreckensieg bi de Belgien- un Luxemburg-Rundfohrt nehm he weer an de Tour de France Deel, wo he up de 18. Deelstreck achter sien Landsmann Arnaud Démare up den tweeten Platz sprinten dee. An dat Enn’n vun de Saison stunn he bi de franzöösch Eendagsrennen Grand Prix d’Isbergues un Paris–Bourges up dat Podium.
In dat Fröhjohr vun de Saison 2019 hett Laporte mit twee Deelstreckensiegen sien eersten Rundfohrtsieg bi den Étoile de Bessèges fast maakt. In‘n Juni wunn he de beide erst Deelstrecken vun de Luxemburg-Rundfohrt, muss dat Rennen aber in Führung liggend up den 4. Afsnitt krankheitsbedingt upgeven. Vi de Tour de France vun dit Johr gung he nah de 8. Deelstreck herut, wunn aber dree Deelstrecken un de Gesamtwertung vun de Tour Poitou-Charentes en Nouvelle-Aquitaine, ehe he de Duo Normand, den Grand Prix d’Isbergues un de Tour de Vendeé up dat Podium afsluuten dee.
In de Saison 2020 kunn he kien wiederen Sieg infohren. Dat Johr dorup wunn he aber de Uptaktsdeelstreck un de Punktewertung vun den Étoile de Bessèges 2021. Bi Dwars door Vlaanderen belegg he achter den Solisten Dylan van Baarle den tweeten Rang, ehe he mit Platz elf bi de Flannern-Rundfohrt sien bit dorhen best Resultat bi en Monument vun den Radsport schaffen dee. An dat Enn’n vun dat Fröhjorh wunn he den Circuit de Wallonie in‘n Massensprint. Bi de Tour de France 2021 gung Christophe Laporte up de 19. Deelstreck in de Utrietergrupp mit un keem achter Matej Mohorič up den 2. Platz, nahdem de sück rund 26 Kilometer vör dat Teel as Solist afsett harr. Bi de Tour du Limousin kunn he een Deelstreck up sien Naam schrieven, wunn aber dornah mit den Grand Prix de Wallonie eerstmals en Rennen bi de UCI ProSeries. Bi Paris–Roubaix keem he to’n Afsluss vun de Saison noch up Platz 6. mini|Christophe Laporte bi de Tour de France 2022 Mit de Saison 2022 wessel Christophe Laporte to dat UCI WorldTeam Jumbo-Visma, um Upgaven as Edelhelper för Wout van Aert to övernehmen. Bi Paris–Nizza vun dat Johr reck he sien eersten Spood up de UCI WorldTour, nahdem sück up de eerst Deelstreck en Trio ut sien Mannschap in den letzten Anstieg vun den Rest vun dat Feld afsetten kunn un he vör sien Teamkollegen Primož Roglič un Wout van Aert winnen drüff. In‘n Anschluss gung he bi de Fröhjohresklassikern an den Start un sett sück bi de E3 Saxo Bank Classic gemeensam mit sien Teamkollegen Wout van Aert rund 43 Kilometer vör dat Teel vun de restlich Fohrer af. Sieger wurr van Aert un he keem up Platz 2 an. Wenig Daag later is he bi Gent–Wevelgem weer up den tweeten Platz fohren, wobi ditmal de Eritreer Biniam Girmay beter weer. Bi de Flannern-Rundfohrt keem he as Negente erstmals in de Top 10. De bit dorhen gröttste Karriereerfolg gelung hüm in dat sülvig Johr up de 19. Deelstreck vun de Tour de France, indem he up de letzt Kilometer vun disse Deelstreck ut dat Feld herut angreep un dree Utrieter noch överhalen kunn. Neben sien Deelstreckensieg nehm he todem en zentraal Rull as Helper vun Jonas Vingegaard in, de den eersten Tour-de-France-Gesamtsieg halen dee. Bi de Däänmark-Rundfohrt wunn he de letzt Deelstreck un wurr dormit ok wegen de dorut Haalt Tietbonifikatschonen den Gesamtsieg vör Magnus Sheffield. To dat Saisonenn’n wurr he dör en Sprintsieg in dat Verfolgerfeld achter den Solosieger Remco Evenepoel Viezweltmeester in dat austraalsch Wollongong. Sien bit dorhen spoodriekste Saison hett he mit den Sieg bi Binche–Chimay–Binche afslooten.
mini|Christophe Laporte bi Paris-Roubaix 2023 2023 is Laporte mit en darten Platz bi den Omloop Het Nieuwsblad in de Saison gahn. Mit Gent–Wevelgem wunn Laporte in‘n März sien eersten Klassiker. He harr sück dorbi 52 Kilometer vör dat Teel tosommen mit sien Teamkapitän Van Aert ut dat Vörderfeld afsett, de hüm den Sieg överleet. Dree Daag later kunn Laporte nah en veer Kilometer langen Solofohrt ut en Fluchtgrupp Dwars door Vlaanderen winnen. Bi de Flannern-Rundfohrt un Paris–Roubaix keem he nich up dat Podium. Nah den Fröhjohresklassikern hett he as Vörbereitung up de Tour de France dat Critérium du Dauphiné fohren. He wunn twee Deelstrecken un de Punktewertung. Bi de Tour de France kunn he kien Top-Resultat recken, hett aber Jonas Vingegaard bi de sien tweeten Gesamtsieg ünnerstütt. An dat Enn’n vun de Saison gung he för de franzöösch Natschonalmannschap bi de Straatenradsport-Europameesterschapen an den Start un wurr den ok Europameester vör sien Teamkollegen Wout van Aert un Olav Kooij, de för de belgische bzw. nedderlannsch Mannschap fohren deen.
2024 verpass Christophe Laporte wegen en Magen-Darm-Grippe den Grootdeel vun de Fröhjohrsklassiker. Bi Paris–Roubaix kehr he woll in dat Fohrerfeld torüch, harr aber all fröh en Defekt un keem blots up Rang 25. Bi de Tour de France is he in dit Johr nich antreeden. Stattdessen hett he bi den Giro d’Italia sien Glück versöcht, muss aber all bi de 8. Deelstreck utstiegen, weil he dree Dag tovör to Fall kommen weer un sück dorvan nich verhaalt harr. Bi de Olympisch Spelen in Paris wunn he de Bronzemedaille in dat Straatenrennen achter Remco Evenepoel un Valentin Madouas. Mit Paris–Tours wunn he in’n Oktober sien letztes Saisonrennen, wobi he sück in’n Twee-Mann-Sprint vör den Tschechen Mathias Vacek dörsetten dee.
Wegen en Virus-Erkrankung hett Laporte ok de eersten Rennen vun dat Johr 2025 verpasst. Eerst in’n Oktober wunn he de nee upleggt Tour of Holland.
2026 wunn he de eerste Deelstreck vun de Andalusien-Rundfohrt vör Bastien Tronchon, Ben Oliver un Søren Wærenskjold. In’t Fröhjor harr he ok ansonsten eenige Platzeeren ünner de Top 5.
Wat he schafft hett 2015 Tour de Vendée 2017 Tour de Vendée 2018 een Deelstreck Étoile de Bessèges twee Deelstrecken un Punktewertung Tour La Provence Tro Bro Leon een Deelstreck Belgien-Rundfohrt een Deelstreck Luxemburg-Rundfohrt 2019 Gesamtwertung, twee Deelstrecken un Punktewertung Étoile de Bessèges Prolog un een Deelstreck Luxemburg-Rundfohrt Gesamtwertung un dree Deelstrecken Tour du Poitou-Charentes 2021 een Deelstreck un Punktewertung Étoile de Bessèges Circuit de Wallonie een Deelstreck Tour du Limousin Grand Prix de Wallonie 2022 een Deelstreck Paris–Nizza een Deelstreck Tour de France Gesamtwertung, een Deelstreck un Punktewertung Däänmark-Rundfohrt Sülvermedaille Weltmeesterschap – Straatenrennen Binche–Chimay–Binche 2023 Gent–Wevelgem Dwars door Vlaanderen twee Deelstrecken un Punktewertung Critérium du Dauphiné Europameester – Straatenrennen 2024 Bronzemedaille Olympisch Sömmerspelen – Straatenrennen Paris–Tours 2025 Tour of Holland 2026 een Deelstreck Andalusien-Rundfohrt
Weblinks
Christophe Laporte in de Datenbank vun Radportseiten.com Christophe Laporte in de Datenbank vun ProCyclingStats.com (engelsch) Christophe Laporte in de Datenbank vun FirstCycling.com Christophe Laporte in de Datenbank vun Olympedia.org (engelsch)
Enkeld Nahwiesen
Kategorie:Mann Kategorie:Börger von Frankriek Kategorie:Boren 1992 Kategorie:Radrennfohrer (Frankriek) Kategorie:Olympiadeelnehmer (Frankriek)