Tadej Pogačar (* 21. September 1998 in Ljubljana) is en slowensch Radrennfohrer. He hett fief Mal de Tour de France wunnen (2020, 2021, 2024, 2025 un 2026), den Giro d’Italia 2024. Todem weer he tweemal Straatenrad-Weltmeester (2024 und 2025) un hett insgesamt 13 Monumente vun den Radsport up sien Naam schreven.
Sportlich Loopbahn Fröhe Johren Tadej Pogačar wurr an’n 21. September 1998 in Ljubljana boren. He is as dat dart vun veer Kinner in de lütt Stadt Komenda rund 20 Kilometer nördlich vun de sloweensch Hööftstadt upwussen. In sien Kindheit speel he tonächst Football bi den Vereen NK Komenda, ehe he sien ölleren Bröer Tilen mit negen Johren to’n Rog Ljubljana Cycling Club folg, wo he sien eerst Radsporttrainings ünner de Upsicht vun Miha Koncilja maken dee. Mit teihn Johren nehm Tadej Pogačar an sien eerst Rennen deel, dat in Trstenik nich wiet vun Kranj stattfunn. Blots een Johr later fier he sien eersten Sieg, as he en Bargrennen to dat Skirebeet Krvavec för sück entscheeden kunn. All in jung Johren wurr de ehmalge sloweensch Radsportler Andrej Hauptman up Tadej Pogačar upmarksom, ehe he sück wenig later as wichtigen Wegbegleiter etableeren dee. 2015 weer he in de Rull as Teamchef tätig as Tadej Pogačar sien eerst internatschonales Junioren-Rennen in'n Rahmen vun de Trofeo Loano Juniors bestrieden dee.
Nahwussklassen As Junior is Tadej Pogačar för den Club Radenska fohren un kreeg mehrere Insätze in dat Natschonalteam. 2015 hett he den Course de la Paix Juniors un de Tour du Pays de Vaud bestreeden, ehe he twee Junioren-Rennen in Slowenien wunn un sück den Gesamtsieg vun de Slovenia Tour Juniors sekern dee. In dat Johr nehm he ok an de U23 Juniore-Europameesterschapen un de Weltmeesterschapen deel. Een Johr later fier he en Deelstreckensieg bi den Course de la Paix Juniors un wurr natschonaler Tietfohrmeester vun de Junioren, ehe he mit den GP Sencur Juniors en wiederes Rennen in Slowenien wunn. In’n September seker he sück de Gesamtwertung un Punktewertung vun den Giro della Lunigiana, wobi he ok de lütt Bargankunft in de Oortschap Ortonovo wunn. Wenige Week later hett he bi de Straatenradsport-Europameesterschapen in dat franzöösch Plumelec de Bronze-Medaille in dat Straatenrennen vun de Junioren haalt.
Mit dat Johr 2017 steeg Tadej Pogačar in de Klass U23 up. He fohr nu för dat sloweensch UCI Continental Team ROG-Ljubljana, dat later ok ünner de Naam Ljubljana Gusto Xaurum an den Start gung. In dat Fröhjohr wurr he tonächst Veert der Istrian Spring Trophy, ehe he as Gesamtfieft vun dat Carpathian Couriers Race de Nahwusswertung vun de poolsch U23-Rundfohrt wunn. In’n Juni hett he en wieder Utroopteeken sett, as he mit blots 18 Johren de Nahwusswertung vun de Slowenien-Rundfohrt wunn un togliek den fieften Rang in de Gesamtwertung schaff. Den Grundsteen för sien Spood bi dit Rennen legg he dorbi bi de Bargankunft vun Rogla, de he up den 5. Platz afsluuten dee. Wenige Week later stunn he bi de Ungarn-Rundfohrt as Gesamtdart up dat Podest. An dat Enn’n vun de Saison hett Tadej Pogačar mehrere Eendagsrennen un wurr 20. in dat U23-Straatenrennen bi de Weltmeesterschapen.
2018 wunn Tadej Pogačar mit blots 19 Johren den Grand Prix Priessnitz spa, de Deel vun den UCI Nations’ Cup U23 weer. He hett up de letzt Deelstreck de Gesamtführung övernommen, de he mit en Vörsprung vun 41 Sekunnen as Solist wunn un hett sück togliek ok in de Nahwusswertung un de Bargwertung dörsett. Kört dornah wurr he bi de sloweensch Meesterschapen Tweet achter Jan Tratnik, womit he sien eerst Medaille in de Elite-Klass haalen dee. Dornah hett he sien Erfolg in de Nawusswertung bi de Slowenien-Rundfohrt noch mal schafft, wobi he ditmal achter Primož Roglič, Rigoberto Urán un Matej Mohorič den veerten Gesamtrang belegg. Sien Dörbröök fier he sluutend bi de Tour de l’Avenir, de as dat wichtigste Rennen vun de Klass U23 gellt. In’n Trikot vun de sloweensch Natschonalmannschap hett he up de söbente Deelstreck die Gesamtführung övernommen, de he bit to dat Enn’n ok nich mehr afgeven hett. Ahn en Deelstreckensieg to fiern , hett he de letzt dree ansprööksvull Bargdeelstrecken immer ünner de Top 5 afslooten un wurr dormit de eerste sloweensch Gesamtsieger vun de franzöösch Nahwussrundfohrt. Sien Vörsprung tegenöver Thymen Arensman ut den Nedderlannen bedroog meest eeneenhalf Minüüt. Nah sien bit dorhen gröttsten Spood wunn Tadej Pogačar ok den Giro della Regione Friuli Venezia Giulia. Bi de Straatenrad-Weltmeesterschapen keem he in de U23-Klass up den 7. Platz.
Wegen sien Leistungen wurr dat UAE Team Emirates all fröh up hüm upmarksom. Noch vör sien Sieg bi de Tour de l’Avenir hett he en Verdrag över 2 Johr bi dat UCI WorldTeam ünnerschreven, wobi he ok Angebote vun de Mannschapen Sky, Quick-Step un Sunweb kreegen harr. De Verbinnen to dat UAE Team Emirates geiht up sien Mentor Andrej Hauptman torüch, de 2004 sülvst för de Manschap fohren weer (dormals Lampre) un all anner sloweensch Talente as Jan Polanc un Luka Pibernik vermiddelt harr. Buterdem wurr Tadej Pogačar nu vun Alex Carera betrüet, de tovör mit Radsport-Grötten as Chris Froome, Vincenzo Nibali un Thor Hushovd tosommenarbeit harr. Neben Pogačar is ok Andrej Hauptman to dat UAE Team Emirates wesselt, wo he de Rull vun en sportlichen Leiter innehm.
2019: Profi-Verdrag bi UAE Team Emirates mini|Tadej Pogačar (rechts) wurrd bi sien Grand-Tour-Debüt achter Primož Roglič und Alejandro Valverde Gesamtdart vun de Vuelta a España 2019 2019 is Tadej Pogačar to dat UCI WorldTeam UAE Team Emirates wesselt. Nahdem he sien eersten UCI-WorldTour-Rennen bi de Tour Down Under un den Cadel Evans Great Ocean Road Race bestreeden harr, wunn he de Gesamtwertung vun de Algarve-Rundfohrt, wobi he de Führung all up de tweet Deelstreck mit en Sieg up de Alto da Fóia övernehm un den Dag drup in dat Tietfohren as Fieft verteidigen dee. In’n Ansluss fohr he bi de Baskenland-Rundfohrt as Sösst eerstmals in de Top 10 vun en UCI-WorldTour-Deelstreckenrennen un hett mit Lüttich-Bastogne-Lüttich sien eerst Monument vun den Radsport bestreeden. In‘n Mai gung he bi de Kalifornien-Rundfohrt an den Start un övernehm mit en Deelstreckensieg up den Mount Baldy de Führung in de Gesamtwertung. Wiel he noch nich 21 Johr olt weer un somit in den USA noch kien Alkohol drinken drüff, kreeg he bi de Siegerehrung nich – as begäng – en Buddel Champagner, sonnern en Plüschboor. In Afwesenheit vun Primož Roglič wurr he in dat Öller vun 20 Johren eerstmals sloweensch Meester in’t Tietfohren, ehe he as Gesamtveert de Nahwusswertung vun de Slowenien-Rundfohrt wunn. Noch bevör he bi de Vuelta a España sien Grand-Tour-Debüt geev, verlänger he in’n Juni sien utloopen Verdrag bit in dat Johr 2023. Bi de Vuelta a España in dit Johr gung Pogačar in dat Öller vun 20 Johren as jüngst Fohrer an den Start. All in de eerst Week harr he all goot Resultate un leeg in den Top 10 vun de Gesamtwertung, ehe he de Bargankunft up de 9. Deelstreck wunn. Mit en wiederen Sieg up de 13. Deelstreck övernehm he de Nahwusswertung un rück up den darten Rang in de Gesamtwertung vör. In de dart Week full he tonächst in de Gesamtwertung up Rang 5 torüch un verlor ok dat Witt Trikot vun den besten Nahwussfohrer an Miguel Ángel López, greep aber up de vörletzt Deelstreck rund 40 Kilometer vör dat Teel an un fier up den Plataformas de Gredos sien darten Deelstreckensieg mit en Vörsprung vun mehr as eenenhalv Minüüt. Dormit weer he ok weer de beste Nahwussfohrer un stunn in Madrid achter Primož Roglič un Alejandro Valverde as Gesamtdart up dat Podest. Bi de Straatenradsport-Weltmeesterschapen keem he up Rang 18.
2020: Eerst Tour-de-France-Sieg mini|Tadej Pogačar övernimmt in dat Tietfohren bi de Tour de France 2020/20. Deelstreck dat Geel Trikot un winnt de Tour In dat Fröhjohr vun de Saison 2020 wunn Pogačar nah twee Deelstreckensiegen de Gesamtwertung vun de Valencia-Rundfohrt un muss sück bi de UAE Tour blots den Briten Adam Yates slahn geven. He wunn aber de afsluutend Bargankunft up den Jabal Hafeet un ok de Nahwusswertung. Nah de dör de COVID-19-Pandemie folgend Rennpaus nehm he in’n Juni an de sloweensch Meesterschapen deel. Tonächst muss he sück in dat Straatenrennen Primož Roglič slahn geven, wunn aber gegen sien ölleren Landsmann dat Eenzeltietfohren up de Pokljuka un kunn so sien tweeten natschonalen Titel fiern. Nah goot Leistungen bi de Strade Bianche un bi Mailand–Sanremo hett Pogačar de verkört Utdragen vun dat Critérium du Dauphiné bruukt, um sück up sien eerste Tour de France vörtobereiten. Dorbi reck he de veerten Gesamtrang.
Bi de Tour de France 2020 gung Tadej Pogačar as Kapitän vun dat UAE Team Emirates an den Start. Up de 4. Deelstreck, de mit en Bargankunft in Orcières Merlette to Enn’n gung, belegg he achter Primož Roglič den tweeten Rang un övernehm de Führung in de Nahwusswertung. Bi de 7. Deelstreck verlor he wegen Siedenwind över een Minüüt up de anner Gesamtklassement-Fohrer. Bi de 8. Deelstreck greep he up den Slussanstieg vun de eerst Pyrenäen-Deelstreck un kunn de verloren Tiet temelk weer wett maken. Dorbi hett he de Ostupfohrt vun den Col de Peyresourde in en nee Rekordtiet schafft. Up de 9. Deelstreck kunn he ok sien eersten Deelstreckensieg in Laruns in‘n Sprint vör Primož Roglič un Marc Hirschi fiern. In de tweet Week vun de Frankriek-Rundfohrt präsenteer sück Tadej Pogačar as gröttst Herutforderer vun Primož Roglič un kunn dissen as eenzig Fohrer in’n Slussanstieg vun de 13. Deelstreck folgen. Bi de Bargankunft vun de 15. Deelstreck kunn he sien intüüschen gesamtführenden Landsmann in‘n Sprint up den Grand Colombier besiegen un fier sien tweeten Deelstreckensieg. To Anfang vun de dart un somit letzt Week leeg Pogačar 40 Sekunnen achter Roglič, verlor up de Königsdeelstreck (17), de up den Col de la Loze to Enn’n gung, nochmal 15 wiedere Sekunn. Up de vörletzt Deelstreck aber (Eenzeltietfohren nah Planche des Belles Filles) övernehm Pogačar de Gesamtführung, wiel he de 36,2 Kilometer lang Streck in Besttiet un meest twee Minüüt flinker as Primož Roglič schaffen un den Rückstand wett maken dee. Den Dag dorup fohr he in dat Geel Trikot in Paris in un weer dornah in dat Öller vun 21 Johren nah Henri Cornet, de bi sien Sieg 1904 eerst 19 Johr olt weer, de tweetjüngste Winner vun de Tour de France. Ok de Barg- un Nahwusswertung kunn he up sien Naam schrieven. An dat Enn’n vun de Saison keem he bi Lüttich-Bastogne-Lüttich achter Primož Roglič un Marc Hirschi as Dart to sien eersten Podiumsplatz bi en Monument vun den Radsport.
2021: Titelverteidigung mini|In dat Johr 2021 winnt Tadej Pogačar (rechts) sien tweet Tour de France 2021 wunn Pogačar mit de UAE Tour un Tirreno–Adriatico twee Deelstreckenrennen vun de UCI WorldTour. Bi beid Rundfohrten wunn he jewiels een Deelstreck, ehe he nah Platz söben bi de Strade Bianche ok bi de Baskenland-Rundfohrt en Deelstreckensieg halen dee. In de Gesamtwertung muss he sück aber den Jumbo-Visma-Duo Primož Roglič un Jonas Vingegaard slahn geven. Nahdem dat UAE Team Emirates sien Start bi den La Flèche Wallonne wegen positiver COVID-19-Tests torüchtrucken harr, wunn Tadej Pogačar wenig Daag later mit Lüttich-Bastogne-Lüttich sien eerst Monument vun den Radsport (vör Julian Alaphilippe un David Gaudu). Nah en längere Rennpaus is he in’n Juni de Slowenien-Rundfohrt fohren, bi de he de 2. Deelstreck nah en Solo över mehr as 20 Kilometer wunn. Mit en Vörsprung vun rund eenenhalf Minüüt wunn he de Gesamtwertung vör sien Teamkolleeg Diego Ulissi.