De gleone ljochtdrager (Selasphorus ardens) is in tige lyts fûgeltsje út 'e famylje kolibrys (Trochilidae). It is in endemyske soarte dy't mar yn in hiel lyts gebiet foarkomt en dêrtroch ien fan 'e meast bedrige kolibrys fan Midden-Amearika is.
Nammeferklearring De skaainamme Selasphorus komt út it Gryksk (selas = glâns en phoros = drager) en betsjut ljochtdrager. De spesifike namme ardens komt fan it Latyn en betsjut baarnend of gleon.
Ferskining De gleone ljochtdrager is in lytse kolibry fan likernôch 7 sintimeter. It mantsje hat in spektakulêre glânzgjende kiel, rôzeread oant oranjeread fan kleur, dy't yn it sinneljocht hast liket te gloeien. De boppekant is brûnzich-grien en de sturt is foar it meastepart readbrún mei swarte rânen. It wyfke is minder opfallend mei in griene rêch, in ljochtbrune ûnderkant en in wytige kiel mei lytse donkere streekjes.
Fersprieding en systematyk De fûgel hat in tige beheind ferspriedingsgebiet en wurdt mar op in pear lokaasjes yn 'e heechlannen fan it westen fan Panama, benammen yn 'e provinsjes Chiriquí en Veraguas (ûnder oare op Cerro Flores). Dêr komme se op hichten tusken de 1.500 en 2.200 meter yn iepen strewelleboskjes en oan 'e rânen fan it berchwâld foar. De soarte is monotypysk, itjinge betsjut dat der gjin erkende ûndersoarten binne.
Ekology Oer de ekology fan 'e soarte is noch net alles bekend. Se fiede harren mei nektar fan blommen en lytse ynsekten en wurde faak yn gebieten mei in soad strewellen sjoen, dy't ûntstien binne nei it kapjen of ferbaarnen fan bosk. Se ha nei alle gedachten wol spesifike natuerlike iepen plakken nedich om te oerlibjen.
Status en bedrigingen Op 'e Reade list fan 'e IUCN hat de gleone ljochtdrager de status bedrige (Endangered). It totale leefgebiet is tige lyts. Hoewol't it ferspriedingsgebiet rûsd wurdt op sa'n 3.000 km², beslacht it feitlike leefgebiet neffens rûzing mar 120 oant 280 km². De populaasje is lyts, fragmintearre en wurdt rûsd op mar 2.000 oant 12.000 folwoeksen fûgels, wylst tocht wurdt dat de oantallen fierder ôfnimme. Om't de fûgel seldsum is, wurdt oannommen dat de rûzing earder by it legere oantal leit. De wichtichste bedriging is it ferlies fan habitat troch lânbou, it ferbaarnen fan fegetaasje en mooglik de ynfloed fan klimaatferoaring op 'e spesifike hichten dêr't se libje.
Kategory:Ljochtdrager Kategory:Fûgelsoarte Kategory:Bedrige fûgel Kategory:Lânseigen fauna yn Panama