It Filmfestival fan Goateboarch (Sweedsk: Göteborg Film Festival), ôfkoarte ta GFF, is in filmfestival yn 'e Sweedske stêd Goateboarch, dat elts jier oan 'e ein fan jannewaris en/of it begjin fan febrewaris holden wurdt. Foarhinne hiet it it Ynternasjonaal Filmfestival fan Goateboarch. It evenemint jout omtinken oan sawol lange as koarte films, en sawol ferheljende films as dokumintêres.
It Filmfestival fan Goateboarch bestiet sûnt 1979 en hat in doer fan tsien dagen. Op 'e earste edysje waarden 17 films fertoand yn 3 filmsealen foar in publyk fan yn totaal 3.000 man. Anno 2012 waarden der 450 films út 70 ûnderskate lannen yn 10 bioskopen en ferskate oare filmsealen fertoand, dêr't 115.000 minsken op ôf kamen. It festival is wichtich as in moetingsplak foar produsinten en regisseurs út 'e Skandinavyske filmyndustry.
Op it Filmfestival fan Goateboarch wurde de Dragon Awards útrikt yn 'e folgjende kategoryen: Dragon Award foar Bêste Skandinavyske Film (ek bekend as Nordiska Filmpriset) Dragon Award foar Bêste Skandinavyske Film – Publykspriis Dragon Award foar Bêste Spylfilm – Publykspriis Dragon Award foar Bêste Skandinavyske Dokumintêre (sûnt 2013) Dragon Award foar Bêste Sweedske Dokumintêre Ingmar Berman International Debut Award (foar in debút as regisseur) Dragon Award foar Nij Talint
Keppelings om utens Offisjele webside fan Filmfestival fan Goateboarch
Kategory:Goateboarch Goateboarch Kategory:Weromkearend evenemint ynsteld yn 1979