Schwerin 280px Kaart Wapen 180px|senter 75px|senter Vlag 90px|senter Land Deelstaat 20px Mecklenburg-Voorpommere Koördinate Stigting 1160 (Duitse stad) Stadstatus 1160 Oppervlak: - Totaal 130,52 vk km Hoogte bo seevlak 44 m Bevolking: - Totaal (31 Desember 2022) 98 596 - Bevolkingsdigtheid 755/vk km Tydsone UTC +1 (MET) - Somertyd UTC +2 (MEST) Burgemeester Bernd Nottebaum (CDU) Amptelike webwerf schwerin.de
Schwerin (Duits: [ʃvɛˈʁiːn] of [ʃvəˈʁiːn], ) is die administratiewe hoofstad van die Duitse deelstaat Mecklenburg-Voorpommere. Met 'n bevolking van 98 596 is dit die kleinste van Duitsland se sestien deelstaathoofstede en na Rostock die tweede grootste stad in Mecklenburg-Voorpommere. Die residensie-ensemble van Schwerin is in 2024 deur Unesco as wêrelderfenisgebied gelys.
Geografie duimnael|links|250px|Die kasteel van Schwerin huisves tans die parlement van Mecklenburg-Voorpommere Schwerin lê in 'n meregebied in die weste van die deelstaat Mecklenburg-Voorpommere, aan die suidwestelike oewer van die Schwerinse Meer (Duits: Schweriner See). Die stadsgebied word deur uitgestrekte bosgebiede omring en beslaan naas die Schwerinse Meer 'n aantal ander mere soos die Heidensee, Ziegelsee, Medeweger See, Lankower See, Ostorfer See, Fauler See, Neumühler See, Burgsee, Pfaffenteich, Grimkesee en Große Karausche.
Die bewoners noem hulle stad dikwels "die stad van sewe mere en sewe woude", wat tans as 'n misleidende verwysing beskou kan word. Dit gaan terug op 'n tyd toe Schwerin nog 'n baie kleiner gebied beslaan het en slegs deursewe mere en uitgestrekte woude omring is. Met die uitbreiding van die stadsgebied het baie bosgebiede verlore gegaan.
Nogtans is 18,5 persent van Schwerin se huidige oppervlakte van 130 vierkante kilometer met woude bedek, en 28,9 persent word deur mere beslaan. Dit is veral die water en woude wat 'n besonderse karakter aan Schwerin gee. Die hoogte bo seevlak wissel van 38 meter vlakby die Schwerinse See tot 86,1 meter in die stadsbuurt Neumühle. Die grootste stede in die omgewing is Lübeck (sowat 54 kilometer noordwes van Schwerin) en Hamburg (94 kilometer wes van Schwerin).
Klimaat Schwerin word deur 'n gematigde klimaat gekenmerk. Vanweë die gure noordoostelike winde is temperature gedurende lentetyd laer as in Noordwes-Duitsland, maar danksy die invloed van die nabygeleë Oossee (of Baltiese See) ervaar mens hier nie die somerhitte nie en geniet ook warmer temperature in die herfs.
Die gemiddelde jaarlikse temperatuur in Schwerin is 8,4 °C, die verskil tussen die gemiddeldes van die warmste en die koudste maand beloop 17,2 °C. Die gemiddelde jaarlikse neerslag was in die periode tussen 1961 en 1990 621 millimeter.
Geskiedenis duimnael|links|Die Pfaffenteich met die katedraal van Schwerin (tans 'n Protestantse kerk) Die eerste verwysings na Schwerin dateer uit die jare 1012/1018 (Zuarina) en 1170 (Zuerin, Zwerin, afgelei van Polabies zvěŕ, letterlik "wilde dier" + die agtervoegsel [-in] of zvěŕin "wildpark, dieretuin, stoetery"). Schwerin se naam gaan moontlik ook terug op die Slawiese god Svarog, sodat Swarzyn letterlik "Plek van Svarog" sou beteken.
Die Duitse stad is in 1160 deur die Welfe-hertog Hendrik die Leeu gestig. In 1167 het dit die setel van 'n graafskap onder graaf Gunzelin von Hagen geword en is in 1358, ná die uitsterwe van die huis Gunzelin, aan die hertogdom Mecklenburg oorgedra.
Schwerin was vanaf die 15de eeu die setel van die hertogdom Mecklenburg-Schwerin wat in 1918 ontbind is. In die periode tussen 1763 en 1837 het Ludwigslust egter as die setel van die hertoë gedien.
Ná 1918 het Schwerin as die hoofstad van die Vrystaat Mecklenburg-Schwerin en sedert die einde van die Tweede Wêreldoorlog as die administratiewe sentrum van die deelstaat Mecklenburg gedien (die westelike gedeelte van Pommere is destyds reeds by Mecklenburg ingesluit).
Ná die ontbinding van die deelstate van die Duitse Demokratiese Republiek (DDR) in 1952 het Schwerin as die hoofstad van die distrik Schwerin gefungeer. Met die Duitse hereniging en die herskepping van deelstate in die gebied van die vroeëre DDR in 1990 het Schwerin weer as hoofstad van die nuwe deelstaat Mecklenburg-Voorpommere gedien.
Ná die Duitse hereniging is die historiese stadskern saam met ander stadsbuurte vanaf 1991 omvattend gerestoureer. Daarnaas word ook die woonstelblokke, wat uit die DDR-tydperk dateer, tans opgeknap.
Verwysings
Eksterne skakels
Amptelike webwerf
Kategorie:Deelstaathoofstede van Duitsland Kategorie:Nedersettings in Mecklenburg-Voorpommere Kategorie:Wêrelderfenisgebiede in Duitsland