Die oranjerand-kurper (Chetia brevis) is 'n vis wat inheems is aan die Komatirivierstelsel in Mpumalanga en kusmere in Mosambiek. Die vis word tot 150 mm lank en staan in Engels as die orange-fringed river bream bekend.
Voorkoms Die vis het 'n groot kop en bek en is olyfbruin. Die sye is turkoois en die skubbe se basisse is baksteenrooi. Die onderkant van die vis is wit en daar is 8 tot 9 donker, vertikale bane oor die lyf. Die dorsale vin het oranje kolle op en die rande is ook oranje. Op die stertvin is daar oranje blokkies en die rand is ook oranje. Die mannetjie se anale vin het groot oranje kolle op wat in twee rye gerangskik is. Die vis word tot 150 mm lank.
Habitat Die vis leef in poele of staande water en floreer in beskutte water. Hulle vreet waterinsekte en klein vissies. Die vis is 'n mondbroeier, die wyfie dra die eiers en larwes in haar mond rond.
Bewaringstatus Die vis word bedreig weens besoedeling en wateronttrekking. Die vis is suksesvol in damme van die Krugerwildtuin hervestig.
Sien ook Alfabetiese lys van visse Kurper Lys van Suider-Afrikaanse visse volgens wetenskaplike name Lys van varswater visfamilies Lys van visfamilies
Bron A Complete Guide to the FRESHWATER FISHES of Southern Africa. Paul Skelton. 2001.
Eksterne skakel Chetia brevis by FishBase
Kategorie:Beenvisse