Die Sagittarius-stroom is in sterrekunde ’n lang, komplekse struktuur wat uit sterre bestaan en rondom die Melkweg kronkel in ’n wentelbaan wat byna die galaktiese pole kruis. Dit bestaan waarskynlik uit gety-afgestroopte sterre van die Sagittarius- Elliptiese Dwergsterrestelsel, wat die gevolg is van die proses van samesmelting met die Melkweg oor ’n tydperk van miljarde jare.
Dié sterrestroom is oorspronklik in 1995 deur Donald Lynden-Bell voorgestel nadat hy die verspreiding van bolswerms in die Melkweg ontleed het. Die werklike struktuur is geïdentifiseer deur Newberg en medewerkers (2002), asook Majewski en medewerkers (2003), met behulp van data van die 2MASS- en Digitale Sloan-lugopname. In 2006 het Belokurov en sy medewerkers bevind die Sagittarius-stroom het twee takke.
Toe die oorspronklike voorwerp tydens die interaksie uitmekaargeskeur is, het dit ossillasies (analoog aan klankgolwe) deur die Melkweg se spiraalarmstruktuur gestuur. Die gevolge van hierdie ossillasies word vandag waargeneem as lae van afwisselend digter en yler sterverspreidings, bo en onder die Sonnestelsel. Tans maak die posisie van die Sagittarius-stroom relatief tot die waargenome lae die Sagittarius- Elliptiese Dwergsterrestelsel die sterkste kandidaat vir dié indringende voorwerp.
Die stroom maak deel uit van die Veld van Strome.
Sien ook Lys van Melkweg se satellietsterrestelsels
Verwysings
Skakels
Kategorie:Boogskutter (sterrebeeld) Kategorie:Melkweg