Frank James Lampard (gebore 20 Junie 1978) is ’n Engelse sokkerafrigter en voormalige middelveldspeler. Hy word wyd beskou as een van die grootste middelveldspelers van alle tye, en as een van die beste spelers van Chelsea and die Premierliga ooit. Lampard hou die rekord vir die meeste Premierliga-doele (177) deur ’n middelveldspeler in die geskiedenis van die liga.
Lampard het sy loopbaan in 1995 by West Ham United begin, die klub waarvoor sy pa, Frank Senior, ook gespeel het. In 2001 is hy vir £11 miljoen deur Londen-meddedingers Chelsea geteken. Oor sy dertien jaar by die klub het Lampard homself ontwikkel tot een van die mees doeltreffende doelgerigte middelveldspelers, en hy het uiteindelik Chelsea se voorste doelskutter van alle tye geword met 211 doele in alle kompetisies. Hy het drie Premierliga-titels, die UEFA Champions League, die UEFA Europa League, vier FA-bekers en twee Liga-bekers gewen. In 2005 is hy aangewys as die Football Writers' Association Footballer of the Year, en het hy as naaswenner geëindig vir beide die Ballon d'Or en FIFA Wêreldspeler van die Jaar. Ná sy vertrek by Chelsea het Lampard vir liga-meddedingers Manchester City en vir die Major League Soccer-klub New York City FC gespeel voordat hy in 2017 afgetree het. Hy het oor tien jaar vanaf 1 Desember 2000 hoog geëindig in verskeie statistieke vir Premierliga-spelers, waaronder meeste wedstryde en meeste oorwinnings.
Lampard het 106 wedstryde gespeel en 29 doele aangeteken vir die Engelse nasionale span, nadat hy in 1999 sy debuut gemaak het. Hy het sy land by drie FIFA Wêreldbekertoernooie verteenwoordig – in 2006, 2010 en 2014 – en by die Europese Kampioenskap in 2004, waar hy in die Span van die Toernooi aangewys is. Sy mees onvergeetlike — en ongelukkige — oomblik in sy loopbaan by die nasionale span het by die Vrystaatstadion in Bloemfontein plaasgevind, tydens die 2010-Wêreldbeker-wedstryd teen Duitsland in die agtste eindrondte. Daar het hy ’n skoot op doel afgevuur wat teen die dwarslat gebons het en, soos duidelik op TV-herhalings gesien kon word, die doellyn oorgesteek het. As dit toegeken was, sou dit die telling na 2–2 gelyk gemaak het. Die skeidsregter en lynregter het dit egter nie as ’n doel gesien nie, en spel is eenvoudig voortgesit.
Lampard het sy afrigterloopbaan in 2018 by Derby County begin en die klub na die eindstryd van daardie seisoen se Championship-eindronde gelei. Hy het ’n jaar later teruggekeer na Chelsea as hoofafrigter, waar hy hulle in sy eerste seisoen na vierde plek en die FA-beker-eindstryd gelei het, voordat hy in 2021 afgedank is. Ná ’n eenjaar-termyn by Everton en ’n kort terugkeer na Chelsea as waarnemer, het Lampard in 2024 by Coventry City aangesluit as hoofafrigter.
Verwysings
Kategorie:Engelse sokkerspelers Kategorie:Sokkerafrigters Kategorie:Geboortes in 1978 Kategorie:Lewende mense