De Pankoekstermole is in mealreeë poldermole en ryksmonumint tusken Wytmarsum en Burchwert yn 'e gemeente Súdwest Fryslân. De mole stiet ûngefear 2,5 km eastlik fan Wytmarsum, tichtby de Harnzerfeart.
Skiednis De Pankoekstermole is in grutte muonts, dy't yn 1900 boud waard, om tegearre mei de yn 1955 sloopte mole 'De Foarútgong' de ûngefear 700 ha grutte Easthimmerpolder te bemeallen. De Pankoekstermole ferfong in út 1817 datearjende mole, dy't in jier earder ôfbaarnd wie. Sawol de Pankoekstermole as de Foarútgong hiene selsswichting.
Yn 1967 krige de Pankoekstermole in diselmotor. Neidat de mole yn 1976 troch de bou fan in gemaal tusken Boalsert en Skettens syn funksje ferlear, waard de diselmotor ferwidere. By in yn datselde jier foltôge restauraasje fan de mole krigen de wjukken âldhollânsk hekwurk. By de restauraasje fan 2014 waard it âldhollânsk hekwurk wer ferfongen troch selsswichting.
De mûne is sûnt 1977 eigendom fan de Stifting De Fryske Mole en op ôfspraak te besichtigjen. It Wetterskip Fryslân wiisde de mole yn 2006 oan as reservegemaal by wetteroerlêst.
Beskriuwing De Pankoekstermole is houten achtkante mole op stiennen fjildmuorren. It achtkant fan 'e mole is reiddutsen. De wjukken fan 'e mole hawwe selsswichting en de flecht is krapoan 20 m.
Sjoch ek Mole yn Fryslân
Keppeling om utens Moledatabank De Pankoekstermole op de Moledatabank De Pannekoekstermole op De Feriening de Hollânske Mûne
Kategory:Wytmarsum Kategory:Mole yn Súdwest-Fryslân Kategory:Ryksmonumint yn Súdwest-Fryslân Kategory:Muonts (mole) Kategory:Poldermole Kategory:Bouwurk út 1900 Kategory:Mole yn Wûnseradiel Kategory:Ryksmonumint yn Wûnseradiel