Ghostbusters is in Amerikaanske mediafranchise dy't yn 1984 begûn mei de súksesfolle film Ghostbusters. De geastlike heit dêrfan wie akteur en senarioskriuwer Dan Aykroyd. De franchise kin ta de sjenres fan fantasy en komeedzje rekkene wurde en omfettet ek science fiction-eleminten. It giet oer in team fan wittenskippers dat yn New York úteinset mei it fangen fan spûken. Ghostbusters bestiet anno 2023 út fjouwer films mei byhearrende soundtrackalbums, twa tekenfilmsearjes, ferskate soundtrackalbums, in stikmannich fideospultsjes, in rollespul, inkele strips en ferskate foarmen fan merchandising, wêrûnder boartersguod. Ghostbusters is eigendom fan filmstudio Columbia Pictures en fan Ghost Corps, dat allebeide dochterûndernimmings fan Sony Pictures binne.
Films Ghostbusters (1984)
Yn Ghostbusters reitsje parapsychologen Peter Venkman (Bill Murray), Ray Stantz (Dan Aykroyd) en Egon Spengler (Harold Ramis) harren baan kwyt by de universiteit, wêrnei't se in bedriuw oprjochtsje, "Ghostbusters", dat spesjalisearre is yn it fangen fan spûken. In hommelse taname fan boppenatuerlike aktiviteit yn New York soarget derfoar dat se al mei gauwens omkomme yn it wurk, sadat se in fjirde teamlid oannimme, Winston Zeddemore (Ernie Hudson). Fia Dana Barrett (Sigourney Weaver), de frou dêr't Venkman fereale op is, rekket it kwartet belutsen by it krewearjen fan Gozer, de Sûmearyske god fan 'e ferneatiging, om ta de reële diminsje troch te brekken, wat se tsjin eltse priis sjen moatte foar te kommen.
Ghostbusters waard regissearre troch Ivan Reitman nei in senario fan Dan Aykroyd en Harold Ramis. De film gie op 7 juny 1984 yn premiêre, en brocht $295,2 miljoen op tsjin in budget fan $25 oant 30 miljoen. Ghostbusters wie dêrmei de op ien nei meast opbringende film fan 1984. De film waard nominearre foar 2 Oscars en 3 Golden Globes (wêrûnder de Golden Globe foar Bêste Film – Musical of Komeedzje), en wûn in BAFTA en in Saturn Award. It wurdt tsjintwurdich rûnom beskôge as ien fan 'e ynfloedrykste komeedzjefilms aller tiden.
Ghostbusters II
Yn Ghostbusters II, dat fiif jier nei de foarfallen yn 'e earste film spilet, hawwe de Ghostbusters, dy't oan 'e ein fan 'e earste film as helden einigen, har kredyt by de befolking fan New York alhiel ferspile troch de hoemannichte skea se mei harren aksjes oanrjochtsje. Lykwols identifisearje se in nije bedriging foar de stêd as se in rivier fan ektoplasmatysk slym ûntdekke, dat reägearret op alle negative emoasjes yn 'e stêd. Dêrtroch makket it de weromkear nei de wrâld fan 'e libbenen mooglik fan in boasaardige Eastjeropeeske kriichshear út 'e santjinde iuw.
Ghostbusters II waard wer regissearre troch Ivan Reitman nei in senario fan Dan Aykroyd en Harold Ramis. Alle wichtige leden fan 'e cast wiene wer fan 'e partij, hoewol't de film benammen in inisjatyf wie fan 'e filmstudio's, dy't de senarioskriuwers en akteurs ûnder druk setten. De film gie op 16 juny 1989 yn premiêre, en brocht $215,4 miljoen op tsjin in budget fan $30 oant 40 miljoen. Nettsjinsteande dat kommersjele súkses ûntfong Ghostbusters II lauwe reäksjes fan 'e filmkritisy en wurdt de ferfolchfilm oer it algemien sjoen as in stik minder as de orizjinele film.
Ghostbusters (2016)
Ghostbusters (letter op dvd en blu-ray útkommen ûnder de titel Ghostbusters: Answer the Call) wie in reboot fan 'e Ghostbusters-franchise mei froulike haadpersoanen. Yn 'e film hawwe de wittenskipsters Abby Yates (Melissa McCarthy), Erin Gilbert (Kristen Wiig) en Jillian Holtzmann (Kate McKinnon) ferskate moetings mei spûken. Dat bringt harren derta om in team te foarmjen dat spûken fangt, dat se oanfolje mei Patty Tolan (Leslie Jones), in wurknimster fan it iepenbier ferfier yn New York. Fjouweresom ûntdekke se dat de boppenatuerlike foarfallen útlokke binne troch Rowan North (Neil Casey), in geastlik steurde wittenskipper dy't oanhelle is mei in godkompleks. Dyselde besiket mei syn eksperiminten troch te kringen ta de diminsje fan 'e spûken, wat mooglik in apokalyps feroarsaakje soe. Der is de froulju dêrom alles oan gelegen him tsjin te hâlden.
Ghostbusters waard regissearre troch Paul Feig nei in senario fan himsels en Katie Dippold. De film gie op 9 july 2016 yn premiêre, en brocht $229,1 miljoen op tsjin in budget fan $144 miljoen. Fanwegen de ûnbidich hege marketingkosten litte de produksje lykwols in oansjenlik ferlies en wurdt Ghostbusters beskôge as in flop. De film wie kontroversjeel om't er de manlike haadpersoanen út 'e earste beide films ferfong troch froulju, wylst de resepsjoniste Janine Melnitz (Annie Potts) út dy films no in manlike resepsjonist waard, spile troch Chris Hemsworth. Yn 'e oangeande kultueroarloggen yn 'e Feriene Steaten late dat op 'e sosjale media ta in stoarm fan krityk troch fans fan 'e franchise.
Ghostbusters: Afterlife
Yn Ghostbusters: Afterlife sette de jonge Trevor (Finn Wolfhard) en Phoebe Spengler (McKenna Grace) har mei harren mem Callie (Carrie Coon) nei wenjen op it boerespultsje yn Oklahoma dat se urven hawwe fan Callie har koartby ferstoarne en fan har ferfrjemde heit. Trevor en Phoebe fine allegear aparte apparatuer en ûntdekke dat harren pake de Ghostbuster Egon Spengler (Harold Ramis †, fia argyfbylden en special effects) wie. De geast fan Spengler liedt harren nei in myn deunby, dêr't de Sûmearyske Gozer fannijs besiket de minsklike wrâld binnen te kringen. Trevor en Phoebe, en harren freonen Lucky (Celeste O'Connor) en Podcast (Logan Kim), moatte kontakt opnimme mei de oerlibjende Ghostbusters en besykje Gozer tsjin te kearen.
Ghostbusters: Afterlife waard regissearre troch Jason Reitman nei in senario fan himsels en Gil Kenan. De film gie op 23 augustus 2021 yn premiêre, en brocht $177,6 miljoen op tsjin in budget fan $75 miljoen. Ghostbusters: Afterlife waard opdroegen oan 'e yn 2014 ferstoarne Harold Ramis.
Ghostbusters: Frozen Empire
Ghostbusters: Frozen Empire spilet trije jier nei de foarfallen yn Ghostbusters: Afterlife. Callie Spengler (Carrie Coon), har frijer Gary Grooberson (Paul Rudd), har bern Trevor (Finn Wolfhard) en Phoebe (McKenna Grace) en harren freonen Lucky Domingo (Celeste O'Connor) en Podcast (Logan Kim) ferhúzje nei New York om Winston Zeddemore (Ernie Hudson) en Ray Stantz (Dan Aykroyd) te helpen by harren weroprjochting fan 'e Ghostbusters. Dêr komme se in oerâld kwea op it spoar. Wylst se de wrâld besykje te rêden, wurde se allegeduerigen tsjinwurke troch Walter Peck (William Atherton), in âlde fijân fan 'e Ghostbusters, dy't it ûnderwilens ta boargemaster fan New York skopt hat.
Ghostbusters: Frozen Empire waard regissearre troch Gil Kenan nei in senario fan himsels en Jason Reitman. De film gie op 22 maart 2024 yn premiêre, en brocht $202,0 miljoen op tsjin in budget fan $100 miljoen.
Tillefyzje The Real Ghostbusters
The Real Ghostbusters is in tekenfilmsearje op basis de earste Ghostbusters-film, dy't sân seizoenen rûn, fan 1986 oant en mei 1991. De searje folget de fierdere aventoeren fan Peter Venkman (seizoen 1–2: Lorenzio Music; seizoen 3–7: Dave Coulier), Ray Stantz (Frank Welker), Egon Spengler (Maurice LaMarche), Winston Zeddemore (seizoen 1–3: Arsenio Hall; seizoen 4–7: Buster Jones), harren resepsjoniste Janine Melnitz (seizoen 1–2: Laura Summer; seizoen 3–7: Kath Soucie) en it spûk Slimer (Frank Welker), dat harren maskotte wurdt. Der waarden yn totaal 140 ôfleverings fan makke, mei dêropta nochris 13 spin-offs oer Slimer, yn 'e foarm fan koarte tekenfilmkes. The Real Ghostbusters waard oarspronklik útstjoerd troch it tillefyzjenetwurk ABC.
Extreme Ghostbusters
Extreme Ghostbusters is in tekenfilmsearje dy't in ferfolch wie op of in spin-off fan The Real Ghostbusters. De searje rûn ien seizoen, fan septimber oant desimber 1997 en der waarden yn totaal 40 ôfleverings fan makke. Extreme Ghostbusters begjint ferskate jierren nei de lêste ôflevering fan The Real Ghostbusters, as it Ghostbustersteam opheft is. Inkeld Egon Spengler (Maurice LaMarche) is noch mei Slimer (Billy West) yn 'e âlde brânwachtkazerne efterbleaun om 'e ynslutingsienheid geande te hâlden, wylst er tagelyk dosint is oan in pleatslike universiteit. As de boppenatuerlike aktiviteit yn New York wer bot oanboazet, rekrutearret er fjouwer fan syn studinten as de nije Ghostbusters: Eduardo Rivera (Rino Romano), Kylie Griffin (Tara Strong), Garrett Miller (Jason Marsden) en Roland Jackson (Alfonso Ribeiro). Extreme Ghosbusters waard oarspronklik yn syndikaasje útstjoerd.
Muzyk Yn it ramt fan 'e Ghostbusters-franchise binne de folgjende soundtrackalbums útkommen: 1984 – Ghostbusters: The Original Soundtrack Album 1989 – Ghostbusters II 2006 – Ghostbusters: Original Motion Picture Score 2016 – Ghostbusters: Original Motion Picture Soundtrack 2021 – Ghostbusters II: Original Motion Picture Score 2024 – Ghostbusters: Frozen Empire It liet Ghostbusters, it haadtema fan 'e films, songen troch Ray Parker jr. wie yn 1984 in grutte nûmer 1-hit.
Strips Yn it ramt fan 'e Ghostbusters-franchise binne de folgjende strips útkommen: 1988–1992 – The Real Ghostbusters 2004–2005 – Ghostbusters: Legion
Spultsjes Fideospultsjes Yn it ramt fan 'e Ghostbusters-franchise binne de folgjende fideospultsjes útkommen: 1984 – Ghostbusters 1987 – The Real Ghostbusters 1989 – Ghostbusters II (kompjûterspultsje) 1989 – Ghostbusters II (consolefideospultsje) 1990 – Ghostbusters 1990 – New Ghostbusters II 1993 – The Real Ghostbusters 2009 – Ghostbusters: The Video Game 2011 – Ghostbusters: Sanctum of Slime 2012 – Ghostbusters: Paranormal Blast 2013 – Beeline's Ghostbusters 2014 – Ghostbusters Pinball 2016 – Ghostbusters 2016 – Ghostbusters: Slime City 2018 – Ghostbusters World 2019 – Ghostbusters: The Video Game Remastered
Oare spultsjes In rollespul yn it ramt fan 'e Ghostbusters-franchise, mei as namme ienfâldichwei Ghostbusters, waard yn 1986 útjûn troch West End Games. It wie ûntwurpen troch Sandy Petersen, Lynn Willis en Greg Stafford.
Keppelings om utens Offisjele webside fan Ghostbusters
Kategory:Amerikaanske mediafranchise Kategory:Amerikaanske filmsearje Kategory:Ingelsktalige filmsearje Kategory:Fantasyfilmsearje Kategory:Komeedzjefilmsearje Kategory:Franchise fan Columbia Pictures Kategory:Franchise fan Sony Pictures Kategory:Filmsearje út 1984 Kategory:Mediafranchise út 1984