De gemeente Amsterdam is in Noardhollânske gemeente yn Nederlân. Wichtichste plak yn 'e gemeente is de stêd Amsterdam.
Amsterdam is neffens ynwennertal de grutste gemeente fan Nederlân. Tegearre mei 29 oare gemeenten makket Amsterdam diel út fan 'e Metropoalregio Amsterdam, dêr't mear as 2,6 miljoen minsken wenje. Op 1 jannewaris 2024 hie 59,6% fan 'e Amsterdamse befolking in migraasje-eftergrûn. Mei De Haach is dat it heechste persintaazje fan it lân. It tal ferskillende nasjonaliteiten yn 'e gemeente heart ta it heechste fan 'e wrâld.
Skiednis Sûnt de 19e iuw hat Amsterdam ferskate omlizzende gemeenten of dielen dêrfan anneksearre, benammen om mear romte te krijen foar stedsútwreiding. Grutte anneksaasjes fûnen plak yn 1877, 1896, 1921 en 1966. Sa kamen ûnder oaren dielen fan Sloten, Nieuwer-Amstel, Watergraafsmeer en Buiksloot by Amsterdam. De útwreidingen makken de bou mooglik fan nije stedswiken, lykas De Pijp, Amsterdam-Súd en grutte parten fan Amsterdam-Noard.
Foarming fan stedsdielen Sûnt 1981 ûntwikkele Amsterdam in stelsel fan stedsdielen mei in eigen bestjoer. De earsten wiene Noard en Osdorp. It stelsel waard letter fierder útwreide en ferskate kearen weryndield. Yn 1990 wiene der sechstjin stedsdielen en yn 2002 krige ek it Sintrum in eigen stedsdielbestjoer.
Op 1 maaie 2010 waarden de fjirtjin bestjoerlike stedsdielen werombrocht nei sân. Oant 19 maart 2014 hiene dy de juridyske status fan dielgemeente. Nei de lanlike opheffing fan 'e dielgemeenten bleau de yndieling yn sân stedsdielen bestean, mar feroare de bestjoersfoarm. Sûnt de weryndieling mei Weesp yn 2022 hat Amsterdam dêrnjonken it stedsgebiet Weesp.
Plan foar in stedsprovinsje Yn 1995 waard besocht om in Stedsprovinsje Amsterdam te foarmjen. Dat plan gie lykwols net troch. By in referindum wiisden de ynwenners fan Amsterdam it plan ôf. Foar it grûngebiet fan 'e plande stedsprovinsje ûntstie letter de Stedsregio Amsterdam, mei minder foech en ambysjes.
Gearfoeging mei Weesp Op 26 maart 2018 naam de gemeenteried fan Weesp it beslút om mei Amsterdam gear te gean. De gearfoeging waard op 24 maart 2022 in feit. De dêrfoar ferplichte weryndielingsferkiezings waarden tagelyk holden mei de gemeenteriedsferkiezings fan 16 maart 2022.
Binnen de gemeente Amsterdam foarmje Weesp en Driemond sûnt de weryndieling it stedsgebiet Weesp. Dit stedsgebiet hat in eigen keazen bestjoerskommisje. Driemond hearde dêrfoar by it stedsdiel Súdeast.
Plakken Stêd Ynwenners Amsterdam 921.927 Weesp 26.082 Doarpen en oare plakken: Buiksloot, Driemond, Durgerdam, Holysloot, Osdorp, Ransdorp, Ruigoord, Schellingwoude, Sloten, Sloterdijk, Zunderdorp
Bestjoer De gemeente Amsterdam is bestjoerlik ferdield yn sân stedsdielen en dêrnjonken it stedsgebiet Weesp. De sân stedsdielen binne:
Sintrum Nij-West Noard East West Súd Súdeast
Elk stedsdiel hat in deistich bestjoer en in streekrjocht keazen stedsdielkommisje. It stedsgebiet Weesp hat in streekrjocht keazen bestjoerskommisje mei in deistich bestjoer.
Foar de geografyske en statistyske yndieling hat Amsterdam dêrnjonken wiken en buerten yn Amsterdam. Dy yndieling komt net oeral folslein oerien mei de bestjoerlike yndieling yn stedsdielen en it stedsgebiet.
Kategory:Gemeente yn Noard-Hollân Kategory:Bestjoerlike ienheid oprjochte yn 1301