Die Rodrigues-wewer (Foudia flavicans) is 'n voëlspesie in die wewerfamilie wat endemies is aan Rodrigues, 'n eiland van Mauritius. Die status van die eens kritiek bedreigde spesie word in 2025 as "minste kommer" op die IUBN-rooilys aangedui, nadat hul getalle sterk herstel het. Dit word wel nog 'n bedreigde status deur die USFWS (Amerikaanse Vis- en Wildlewediens) toegeken.USFWS. Addition of 30 African birds to list of endangered and threatened wildlife. Federal Register 12 Januarie 1995.
Hierdie voël is 12–13 cm lank. Die volwasse mannetjie se kleur is geel met 'n oranje gesig en bruin rug, vlerke en stert. Die wyfies en onvolwasse mannetjies is baie valer gekleurd.
Die voël kan in die blaredak op 'n hoogte van minstens 5 meter gevind word, en vlieg soms sosiaal in swerms. Dit word in assosiasie met die Norfolkeilandden (Araucaria cunninghamii) en 'n paar ander ingevoerde plantspesies aangetref, waarin hul neste ook geplaas word. Meer voëls word in gebiede met digter, hoër bome en 'n groter diversiteit van boomspesies aangetref.Impey, A.J., et al. (2002). Population recovery of the threatened endemic Rodrigues fody (Foudia flavicans) (Aves, Ploceidae) following reforestation. Biological Conservation 107(3) 299-305. Dit voed op insekte, spinnekoppe, sade, nektar, en vrugte.
Die nes is 'n bol- tot ovaalvormige struktuur met 'n sy-ingang en kort stoepie, saamgeweef van grasse, buigsame takkies en worteltjies. Dit word dikwels sowat 1,5 tot 4,5 meter van die grond af aan die einde van 'n Araucaria-boom se tak geplaas. Die nes word met vere uitgevoer, en twee tot drie ligblou eiers word daarin gelê. Die legsel word deur die wyfie alleen uitgebroei, maar die kuikens word deur albei ouers gevoer.
Die spesie was voorheen volop op die eiland, maar is deur tropiese storms en ander faktore tot bykanse uitsterwing gedryf sodat daar in 1968 slegs 5 of 6 pare oor was. Danksy bewaringspogings het hul getalle teen die jaar 1999 weer tot tussen 900 en 1 200 indiwidue aangewas, en in 2016 tot bykans 20 000.
Die grootste bedreiging vir die spesie is die vernietiging van hul woudhabitat. Die natuurlike bos is skoongemaak om vir bestaansboerdery en vee plek te maak. Die voël kompeteer ook met sy ingevoerde familielid, die rooi Madagaskarwewer (Foudia madagascariensis). Siklone en droogtes verminder hul kosvoorraad.
Bewaringspogings sluit herbebossing in, die hoofoorsaak vir die toename in hul getalle, terwyl heinings ook vee uit hul habitat hou.
Verwysings
Kategorie:Wewervoëls