Trio Mandili (Georgies: ტრიო მანდილი) is ’n Georgiese musiekgroep.
Mandili verwys na die gelyknamige Georgiese serp wat deur vroue gedra word. Hulle sing in die dialek van Chevsoeretië.
Die groep is op 5 April 2014 gestig en het in dieselfde jaar deurgebreek toe hulle ’n video van hul lied “Apareka” gemaak en dit aanlyn op YouTube geplaas het. Die video het meer as 8 miljoen kyke gekry. Hulle gebruik die pandoeri, ’n tradisionele Georgiese snaarinstrument, en ’n polifoniese sangstyl, wat ’n tipe musikale tekstuur is wat bestaan uit twee of meer gelyktydige, onafhanklike melodielyne.
In 2017 het die groep deelgeneem aan die kompetisie om Georgië op die Eurovision-sangfees te verteenwoordig, waar hulle 12de uit 25 deelnemers geëindig het.
Trio Mandili het liedjies in ander tale gesing, soos die Hindi-lied “Goron Ki Na Kalon Ki Duniya Hai Dilwalon Ki” (Afrikaanse vertaling: Nie aan die blankes of die swartes behoort die wêreld nie, maar aan die goedhartiges) wat op Indië se Republiekdag opgevoer is, sowel as die Poolse lied “Lipka” (Afrikaans vertaling: Klein linde) en die Hebreeuse lied “Adon Olam”.
Op hul YouTube-kanaal het Trio Mandili ook liedjies in Spaans, Italiaans, Oekraïens en Russies opgeneem.
Diskografie
2015: With Love (CD, Georgië) 2016: With Love (Grammofoon, Duitsland) 2017: Enguro 2022: Sakartvelo
Verwysings
Eksterne skakels
Trio “Mandili” op YouTube Trio “Mandili” op Twitter Trio “Mandili” op AllMusic Trio Mandili op Discogs
Kategorie:Georgiese musiekgroepe