José René Higuita Zapata (gebore 27 Augustus 1966) is ’n voormalige Colombiaanse professionele sokkerspeler wat as doelwagter gespeel het. Hy was bekend vir sy gewaagde spelstyl, waar hy dikwels ver uit sy doelgebied uitgedwaal het en sy doelhok oopgelaat het. Tydens sy loopbaan het hy 41 doele aangeteken, waarvan drie vir die Colombiaanse nasionale span.
Sy eerste groot toernooi was die 1987 Copa América, waar die span in die eerste rondte uitgeskakel is. By die Wêreldbekertoernooi in 1990 het hy ’n belangrike rol gespeel om sy land vir die eerste keer na die agtste eindronde te lei, maar hy is egter in die agtste eindronde deur Kameroen se Roger Milla uitoorlê ver buite die doelgebied, wat daartoe bygedra het dat Colombia uitgeskakel is. Hy het dit self beskryf as “’n fout so groot soos ’n huis”, en sy spelstyl het gelei tot die bynaam El Loco (“Die Malman”).
Hy is ook bekend vir die “skerpioenredding” wat hy teen Engeland by Wembley in 1995 uitgevoer het, waar hy vorentoe gespring en die bal met die skoensole weggeskop het.
Die International Federation of Football History & Statistics het Higuita as die 8ste beste Suid-Amerikaanse doelwagter in die geskiedenis gerangskik. Met sy 41 doele is hy ook een van die 10 doelwagters wat die meeste doele in die geskiedenis aangeteken het.
Verwysings
Kategorie:Colombiaanse sokkerspelers Kategorie:Geboortes in 1966 Kategorie:Lewende mense