Victorio Maximiliano "Maxi" Pereira Páez (gebore 8 Junie 1984) is ’n voormalige Uruguaanse professionele sokkerspeler wat as regteragter gespeel het.
Hy het vir Defensor in Uruguay gespeel voordat hy in 2007 by Benfica in Portugal aangesluit het. Hy het agt seisoene daar deurgebring, 333 amptelike wedstryde gespeel en 11 belangrike titels gewen. In 2015 het hy by Porto aangesluit, ook in Portugal.
Pereira het 125 keer vir Uruguay uitgedraf en het die land verteenwoordig in drie Wêreldbekers en vier Copa Américas. Hy is gekies vir die span by die 2010 FIFA Wêreldbeker in Suid-Afrika en het in al die wedstryde en minute gespeel vir die span wat tot die halfeindronde gevorder het. In die kwarteindstryd teen Ghana het hy sy strafskop in die skietreeks mis, maar Uruguay het tog deurgedring na die volgende ronde. Daar het hy sy eerste doel vir die nasionale span aangeteken in ’n 2–3 nederlaag teen Nederland, met ’n laat doel in die 91ste minuut. Een jaar later het hy saam met Uruguay die Copa América gewen in die buurland Argentinië.
Verwysings
Kategorie:Uruguaanse sokkerspelers Kategorie:Geboortes in 1984 Kategorie:Lewende mense