Ene Verkölen oder Verkölung(e), oostfreesch Verkollen oder Verkolleree, westmönsterländsch ook Verkööldheid, betekent verscheden Süken, de Viren uutlööst un de Atenwege, besunner de Nesen, Strotte un Sluuk anfallt.
Eerste Kennteken könnt binnen twee Dagen na den Kuntakt med den Virus upkomen. Typsche Symptome sind Hoosten, Halswee, Snodder uut de Nesen, Pruusten, Kopppien un Fever. De Süke end normalerwiese binnen seven bet teggen Dagen. Af un an könnt Symptome man ook bet dree Weken blieven.
Över 200 Virenstämme könnt ene Verkölen överdregen. Rhinoviren, Coronaviren, Adenoviren un Enteroviren sind de meest verbreed. De Viren verbreed sik över de Luft, oder indirekt över Kuntakt med Saken in’n Ümfeld, up de vele Viren man bloot kort överleevt.
Verkölen sind bi Kinner düchtig faken. Een Tittkind verköölt sik wat bi 6- bet 8-maal dat Jaar, een 9-Jare oold Kind 3- bet 5-maal un Vullwussen 1- bet 2-maal dat Jaar.Gustav-Adolf von Harnack, Berthold Koletzko: Kinder- und Jugendmedizin (= Springer-Lehrbuch.). 13. So is de Verkölen de meest verbreed Infektschoonskrankheid bi’n Minschen.
Wat anners is de „echten“ Grippe (Influenza), de enen swarer Verlopp het un bi’n Minschen med enen swacken Immuunsysteem, to’n Bispeel Oolde oder Tittkinner, ook den Dood bringen kann.
Nettverwiese
Einzelnachweise