Bookholt () is en Dörp in de Gemeen Visselhöövd in’n Landkreis Rodenborg, Neddersassen. De Oort billt binnen de Gemeen de polietsche Oortschop Bookholt.

To Bookholt höört ok de lüttjen Öörd Affwinkel un Wööstenhoff mit bi.

Geografie

De Oort liggt in de Lümbörger Heid. Dat Water ut dat Rebeed flütt över’n Visselbeek af.

De Naveröörd sünd Hütthoff in’n Noorden, Roosbrook un Moordörp in’n Noordoosten, Hiddingen, Schwitschen un Hälßen in’n Süüdoosten, Stölpenhoff, Affwinkel, Wööstenhoff, Visselhöövd un Nindörp in’n Süden, Wittörp in’n Westen un Düüsternheid, Bretel un Nee-Bretel in’n Noordwesten.

Historie

In Bookholt leeg dat Good Bookholt, dat fröher de Familie von Schlepegrell tohöört hett. Üm de Johrhunnertwenn von dat 19. to dat 20. Johrhunnert hebbt de Bookholter Buurn dat Good opköfft.

Verwaltungsgeschicht

In de Franzosentied von 1810 bet 1814 hett de Oort to de Mairie Stellich in’n Kanton Wasra höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Visselhöövd in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en un grötteren Landkreis Rodenborg tohoopgahn is.

De Oort hett fröher tohoop mit Affwinkel, Wööstenhoff, Roosbrook un Hütthoff de Buurschop Bookholt billt. In dat 19. Johrhunnert hebbt denn Roosbrook un Hütthoff en egen Gemeen billt un de Gemeen Bookholt hett ut Bookholt, Affwinkel un Wööstenhoff bestahn. Düsse Gemeen is an’n 1. März 1974 mit de Gemeenreform in Neddersassen Deel von de Gemeen Visselhöövd worrn. Sietdem billt de Oort de Oortschop Bookholt mit en egen Oortsvörsteiher.

Inwahnertall

Religion

Bookholt is evangeelsch-luthersch präägt un höört to dat Kaspel von de Johannis-Kark in Visselhöövd.

För de Kathoolschen weer von 1852 bet 1960 de Kapell op Slott Kedenborg tostännig. Nu is de Hart-Jesu-Kark in Visselhöövd tostännig, de siet 1. August 2004 to de Karkengemeen St. Maria von’n hilligen Rosenkranz in Wasra tohöört.

Oortsvörsteihers

1991–: Friedemann Götz –2008: Irmgard von Deylen 2008–: Dominik Oldenburg

Weertschop un Infrastruktur

Bookholt hett en egene freewillige Füürwehr, de 1934 grünnt worrn is.

Verkehr

An Bookholt langs löppt de Kreisstraat 210, de in’n Noorden över Hutthoff, Roosbrook un Bellen na Brookel an de Bundsstraat 71 ran geiht un in’n Süden na de B 440. De B 440 löppt in’n Noordwesten över Wittörp na Rodenborg un in’n Süüdoosten över Visselhöövd un Oddingen na Derpmark.

De nächste Autobahn is de Autobahn 27 (Afsnidd Bremen–Wasra). De Opfohrt 27 Wasra-West liggt so 20 Kilometer in’n Süden von Bookholt an de B 209. De Opfohrt 46 Derpmark op de Autobahn 7 (Afsnidd Hamborg–Hannover) liggt 22 Kilometer in’n Süüdoosten an de B 440.

De nächste Bahnhoff is so bi veer Kilometer wied weg in’n Süden de Bahnhoff Visselhöövd an de Bahnlien Ülzen–Langwedel.

Scholen

De Kinner ut Bookholt gaht na de Grundschool Visselhöövd. Ganz fröher sünd se in Nindörp na School gahn. 1788 hett de Oort dat Recht kregen, en egen Schoolmeester intostellen. Dat Kunsistorjen harr aver de Oplaag maakt, dat Bookholt den Schoolmeester in Nindörp liekers mit betahlen mutt. Dorüm hett Bookholt eerst 1803 en egen Schoolmeester instellt, nadem de Schoolmeester in Nindörp doodbleven is. De Ünnerricht weer toeerst in en Hüßelhuus, 1807 hett de Oort dat eerste egene Schoolhuus kregen. Dat is bet 1960 bruukt worrn. In dat Johr is dat ne’e Schoolhuus trech worrn. De School harr 180.000 Mark köst. Se is aver blots negen Johr bruukt worrn. 1969 is se dichtmaakt worrn un de Kinner sünd op de School in Visselhöövd wesselt. Later sünd se en Tied lang na de Grundschool Wittörp gahn un siet 2015 na de Grundschool Visselhöövd.

Footnoten

Kategorie:Oort Kategorie:Landkreis Rodenborg (Wümm)