Neenföör (; ok Schütthuus nöömt) is en lütten Oort in de Gemeen Kerklinneln in’n Landkreis Veern, Neddersassen. Binnen de Gemeen Kerklinneln höört de Oort to de polietsche Oortschop Armsen.

Geografie

De Oort liggt op de Linnelner Geest an’t Över von’n Gohbeek. Dat siede Land ümto is deelwies Moor, von dat en Deel in’n Noorden as Naturschuulrebeed Höhnermoor schuult is.

De Naveröörd sünd Kohlenföör, Neenkroog un Gohbeek in’n Noordoosten, Kükenmoor in’n Oosten, Veernermoor in’n Süüdoosten, Saasloh un Neernabargen in’n Süden, Armsen in’n Süüdwesten, Specken in’n Westen un Ramels un Kerklinneln in’n Noordwesten.

Historie

Dat eerste Huus in Neenföör is üm 1693 rüm von’n Holtvaagd (Schütter) Flömer anleggt worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Kerklinneln in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Kerklinneln in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort hett von öllers to de Gemeen Armsen mit bihöört, de an’n 1. Juli 1972 mit de Gemeenreform in Neddersassen Deel von de Gemeen Kerklinneln worrn is.

Inwahnertall

Religion

Neenföör is evangeelsch-luthersch präägt un höört to dat Kaspel von de Petrus-Kark in Kerklinneln.

För de Kathoolschen is de St.-Josef-Kark in Veern tostännig.

Weertschop un Infrastruktur

Verkehr

Dör Neenföör löppt en lüttje Straat, de in’n Noordwesten an Ramels langs na Kerklinneln an de Kreisstraat 12 un an de Landsstraat 171 ran föhrt un in’n Oosten bi Kükenmoor an de K 13. De L 171 föhrt in’n Süüdwesten na Veern un in’n Noordoosten över Lüttjen Heinz un Jeddingen na Visselhöövd. De K 13 geiht in’n Süüdwesten na Neernabargen un wieder an de L 160.

De nächste Autobahn is de Autobahn 27 (Afsnidd Bremen–Wasra). Ofschoonst de Autobahn in en Afstand von blots knapp een Kilometer in’n Süüdwesten von’n Oort langsföhrt, is de nächste Opfohrt (de Opfohrt 26 Veern-Oost) söven Kilometer wied weg in’n Noordwesten von Neenföör an de L 171.

De nächste Bahnhoff is so bi teihn Kilometer in’n Westen de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen. Op de Bahnlien Veern–Wasra hett dat von 1910 bet 1969 Personenverkehr geven. De Bahnhoff Armsen weer in disse Tied söven Kilometer in’n Süüdwesten. De Bahnhoff Kerklinneln an de Bahnlien Ülzen–Langwedel (inricht 1873) weer fiev Kilometer in’n Noordwesten, is aver 1987 dichtmaakt worrn.

Scholen

De Kinner ut Neenföör sünd fröher in Kükenmoor na de Volksschool gahn. Nadem de School dichtmaakt hett, gaht se vondaag op de Lintler Geest-School in Bennbössel.

Footnoten

Kategorie:Oort Kategorie:Landkreis Veern