Wall () is en Dörp in de Gemeen Veern in’n Landkreis Veern, Neddersassen. Binnen de Gemeen Veern billt de Oort de polietsche Oortschop Wall.

Geografie

De Oort liggt op de Achem-Veerner Geest. Dat Water ut dat Rebeed flütt in’n Westen över Gravens af na de Ole Aller un in’n Oosten över’n Halsbeek.

De Naveröörd sünd Oobering in’n Noorden, Heidkroog un Holbm in’n Noordoosten, Brammer un Kreepm in’n Oosten, Deelsen un Scharnhors in’n Süüdoosten, Doomöhlen un Ulemöhlen in’n Süden, Daulsen in’n Süüdwesten, Nindörp un Förth in’n Westen un Hobüttel un Schüülg’n in’n Noordwesten.

Historie

Wall kummt an’n 24. Mai 935 as Walle toeerst in en Oorkunn vör, in de König Hinnerk I. de Kark in Hamborg un den Hambörger Arzbischop Unni bestätigt, dat de Eddelherr Willarius sien Besitt in negen Dörper bi Langwedel gegen Besitt von de Hambörger Kark tuuscht hett.

An’n 14. Dezember 1934 sünd bi en Unfall an’n Bahnövergang von de Bundsstraat 215 över de Bahnlien Ülzen–Langwedel 16 Lüüd von de Camper Speeldeel doodbleven, as en Bus mit’n Tog von Adolf Hitler tohoopstött is.

Verwaltungsgeschicht

In de Franzosentied von 1810 bet 1814 weer de Oort Seet von de Mairie Wall in’n Kanton Veern. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Huusvaagdie Veern in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort is an’n 1. Juli 1972 mit de Gemeenreform in Neddersassen Deel von de Gemeen Veern worrn. Binnen de Gemeen Veern billt de Oort nu en Oortschop mit egen Oortsraad un Oortsbörgermeester.

Inwahnertall

Religion

Wall is evangeelsch-luthersch präägt un höört to dat Kaspel von’n Doom to Veern.

För de Kathoolschen is de St.-Josef-Kark in Veern tostännig.

Oortsraad

Liddmaten 2016: CDU: Volker Delventhal, Kirsten Förstmann, Clemens Jacobs, Detlef Peterson, Kai Rövekamp, Susanne Sellinger, Cord Heinrich Willenbrock SPD: Knut Heinisch, Jens Wilkens, Kathrin Woltert Gröne: Maike Busch

Oortsbörgermeesters

Tied Naam Partei –2016 Friedel Plenge CDU 2016– Detlef Peterson CDU

Kultur

Verenen

De Schüttenvereen Wall is 1934 grünnt worrn, de TSV Wall 1913 un de Heimatvereen 1988.

In’n Oosten von’n Oort liggt de Golfplatz von’n Golf-Club Veern.

Weertschop un Infrastruktur

Wall hett en egene freewillige Füürwehr, de 1942 grünnt worrn is. Vörher harr dat al siet 1. April 1902 en Plichtfüürwehr geven.

In’n Noorden von Wall steiht en 134 Meter hogen Funktoorn ut Stahlbeton von de Düütsche Telekom AG (Typentoorn FMT 2/73).

In’n Oort gifft dat an de Waller Heerstraat 99 en Filiaal von de Volksbank Werser-Aller un an de Waller Heerstraat 54 en lütten SB-Standoort von de Kreisspoorkass Veern.

Verkehr

Dör Wall löppt de Bundsstraat 215, de in’n Noordoosten na Rodenborg geiht un in’n Süden över Daulsen na Veern un Dörbern. In’n Noordoosten geiht de Kreisstraat 11 na Holbm. Lüttjere Straten föhrt na Schüülg’n, Nindörp un Scharnhors.

De nächste Autobahn is de Autobahn 27 (Afsnidd Bremen–Wasra). De Opfohrt 25 Veern-Noord liggt knapp een Kilometer in’n Süüdwesten von Wall an de B 215.

De nächste Bahnhoff is so bi söss Kilometer wied weg in’n Süden de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen. An’n Oort langs löppt ok de Bahnlien Veern–Rodenborg. För düsse Bahnlien gifft dat in Wall en Bedrievsbahnhoff. Tosätzlich löppt ok noch de Bahnlien Ülzen–Langwedel in’n Süden von Wall langs.

Scholen

In dat Dörp gifft dat de Grundschool Wall un en Kinnergoorn.

Footnoten

Kategorie:Oort Kategorie:Landkreis Veern