De Breednau () is en Deel von’n Oort Hu’e in de Gemeen Otterbarg in’n Landkreis Veern, Neddersassen.

Geografie

De Oort liggt langtagen langs en enkelte Straat twüschen den Noordarm un den Süüdarm von de Wümm.

De Naveröörd sünd Quelkhoorn mit Suurheid un Willemshusen in’n Noorden, Kamp un Otterbarg in’n Oosten, Köbens un Bornmoor in’n Süden un Hu’e in’n Westen.

Historie

Verwaltungsgeschicht

In de Franzosentied von 1810 bet 1814 hett de Oort to de Mairie Hu’e in’n Kanton Otterbarg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1859 to de Amtsvaagdie Wilst in dat Amt Otterbarg tohöört un denn von 1859 bet 1885 to dat Amt Achem. Na 1885 weer dat in’n Kreis Achem, de 1932 Deel von’n Kreis Veern worrn is.

De Oort hett al jümmer to de Gemeen Hu’e höört. De Gemeen Hu’e is an’n 1. Juli 1972 mit de Gemeenreform in Neddersassen Deel von de Gemeen Otterbarg worrn.

Inwahnertall

Religion

De Breednau is evangeelsch-luthersch präägt un höört to dat Kaspel von de Leevfroon-Kark in Hu’e.

För de Kathoolschen is de St.-Matthias-Kark in Achem tostännig.

Kultur

In de Breednau liggt dat Otto-Modersohn-Museum un siet 2016 ok dat Kunstmuseum Kunst am Fluss Fischerhude.

Weertschop un Infrastruktur

Verkehr

De eenzige Straat ut de Breednau rut geiht in’n Westen na Hu’e an de Kreisstraat 2, de in’n Noorden na Quelkhoorn an de Landsstraat 154 geiht un in’n Süüdwesten över Sao’ern na Eiten an de L 168. De L 154 föhrt in’n Noordwesten över Rutendorp un Seebargen na Falkenbarg bi Leendaal un in’n Oosten na Otterbarg un Söttmer.

De nächste Autobahn is de Autobahn 1 (Afsnidd Hamborg–Bremen). De Opfohrt 52 Eiten liggt so ölven Kilometer in’n Süüdwesten von de Breednau an de L 167.

De nächste Bahnhoff is so bi söven Kilometer wied weg in’n Süüdwesten de Bahnhoff Sao’ern an de Bahnlien Hamborg–Bremen.

Lüüd

De Breednau weer Deel von de Künstlerkolonie Hu’e. To de Künstlers in de Breednau hebbt Otto Modersohn, Heinrich Breling, Wilhelm Heinrich Rohmeyer, Christian Modersohn, Olga Bontjes van Beek un Mietje Bontjes van Beek tellt. De Verleger Wolf-Dietmar Stock leevt ok in de Breednau.

En Deel von de Nakamen von dat Huus Hohenzollern, dat fröher de düütschen Kaisers stellt hett, hett in de Breednau leevt, ünner annern Louis Ferdinand Prinz von Preußen (1944–1977) un Georg Friedrich Prinz von Preußen.

Footnoten

Kategorie:Oort Kategorie:Landkreis Veern