Winkelmoor () is en Dörp in de Gemeen Worpsweed in’n Landkreis Oosterholt, Neddersassen.
Geografie
De Oort liggt in dat Düvelsmoor. Dat Water ut dat Rebeed warrt över’n Umbeek na de Hamm hen afföhrt.
De Naveröörd sünd Nee Sankt Jürgen in’n Noorden, Slussdörp in’n Süden un Mevenst un Överhamm in’n Westen.
Historie
Winkelmoor is 1789 as 1,5 Kilometer lang Stratendörp un Moorkolonie grünnt worrn.
In’n Eersten Weltkrieg sünd dree Soldaten ut Winkelmoor fullen oder vermisst un in’n Tweten Weltkrieg ok dree.Onlineprojekt Gefallenendenkmäler
Verwaltungsgeschicht
In de Franzosentied von 1810 bet 1814 hett de Oort to de Mairie Worpsweed in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1852 to de Moorvaagdie Huttenbusch in dat Amt Otterbarg tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.
De Oort weer bet 1929 en egen Gemeen. In dat Johr is Winkelmoor an de Gemeen Mevenst kamen. De Gemeen Mevenst wedder is an’n 1. März 1974 mit de Gemeenreform in Neddersassen Deel von de Gemeen Worpsweed worrn.
Inwahnertall
Religion
Winkelmoor is evangeelsch-luthersch präägt un höört to dat Kaspel von de Zion-Kark in Worpsweed.
För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.
Kultur
En Denkmaal för de Fullenen ut de twee Weltkrieg’ steiht in Worpsweed bi de Kark.
Verenen
De Heimatvereen Mevenst/Winkelmoor is an’n 19. April 1985 grünnt worrn.
Weertschop un Infrastruktur
För Winkelmoor is de freewillige Füürwehr Mevenst mit tostännig.
Verkehr
De Dörpstraat von Winkelmoor löppt in’n Westen wieder na Mevenst an de Landsstraat 153 ran, de in’n Noorden över Huttenbusch na Korlshöben geiht un in’n Süden na Worpsweed un op Leendaal to.
De Opfohrt 16 Bremen-Noord op de Autobahn 27/270 liggt so 22 Kilometer in’n Süüdwesten von Winkelmoor an de B 74. De Opfohrt 17 Dreeeck Bremen-Industriehavens op de Autobahn 27/281 liggt lieker wied in’n Süüdwesten.
De nächste Bahnhoff is so bi 17 Kilometer wied weg in’n Süüdwesten de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok op de Bahnlien Stood–Oosterholt Personenverkehr geven. De Bahnhööv Weyerdeelen-Umbeek un Nee Sankt Jürgen legen üm un bi dree Kilometer in’n Süüdwesten/Noordwesten von dat Dörp.
Footnoten
Kategorie:Oort Kategorie:Landkreis Oosterholt