Veerhöben () is en Dörp un Gemeen in de Samtgemeen Solzhusen in’n Landkreis Horborg in Neddersassen mit .

Blangen Veerhöben sülvs höört to de Gemeen von öllers ok de lüttjen Öörd Sneed un We’ermööd mit to.

Geografie

Dat Dörp liggt in de Lümbörger Heid. Dat Water ut dat Rebeed flütt över de Norbeek na de Luh hen af. Dör den Westen von de Veerhöbener Feldmark flütt ok de Luh sülvs. De Oosten von de Feldmark warrt sien Water över lüttjere Beken na’n Huusbeek hen loos.

De Navergemenen sünd Radbrouk un op en lütt Enn Reppenstää in’n Noordoosten, Karkgellsen in’n Oosten, Westergellsen in’n Süüdoosten, Solzhusen in’n Süüdwesten un Gastää in’n Noordwesten.

Historie

Veerhöben kummt üm 1190 rüm as Wiberzingborstolde toeerst in de Oorkunnen vör. In de Tied von de Pest üm 1350 is dat Dörp aver wööst fullen. Later sünd dor aver wedder ne’e Hoffsteden grünnt worrn. Dat weren veer Stück un dorüm dükert later in de Oorkunnen de Naam Tho dem Veer Höben op.

In’n Eersten Weltkrieg sünd 12 Soldaten ut Veerhöben fullen oder vermisst un in’n Tweten Weltkrieg 16.Onlineprojekt Gefallenendenkmäler

Verwaltungsgeschicht

In de Franzosentied von 1810 bet 1814 hett de Oort to de Mairie Karkgellsen in’n Kanton Garlstörp höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Amtsvaagdie Garlstörp in dat Amt Winsen tohöört un denn von 1852 bet 1859 to dat Amt Solzhusen. To de Tied hett ok de Eenhoff noch to de Gemeen totellt. As aver dat Amt Solzhusen 1859 oplööst worrn is, keem de Eenhoff an Karkgellsen in dat Amt Lüün. Veerhöben keem wedder an dat Amt Winsen. Ut dat amt winsen is 1885 de Kreis Winsen worrn, de 1932 Deel von’n Kreis Horborg worrn is.

Inwahnertall

bet 1939 blots dat Dörp Veerhöben, na 1939 de Gemeen Veerhöben

Religion

Veerhöben is evangeelsch-luthersch präägt un höört to dat Kaspel von de Johannis-Kark in Solzhusen.

För de Kathoolschen is de St.-Maria-Kark in Äästörp tostännig, de siet 1. November 2014 to de Karkengemeen St. Petrus in Bookholt tohöört.

Kultur

In Veerhöben steiht en Denkmaal för de Fullenen ut de twee Weltkrieg’.

Politik

Gemeenraad

Liddmaten 2011: CDU: Klaus-Peter Albers, Rüdiger Buschmann, Helmut Gehrke, Willi Helmke, Malte Twesten, Sören Wohler SPD: Eberhard Leopold, Andrea Schmidt, Matthias Schuh, Kurt Wenzel Gröne: Hilke Beer 2016: CDU: Dirk Albers, Willi Helmke, Volker Kruse, Sören Wohler SPD: Eberhard Leopold, Uwe Meier, Andrea Schmidt, Matthias Schuh, Petra Wahle

Börgermeesters

Tied Naam Partei 1996–2016 Helmut Gehrke CDU 2016– Eberhard Leopold SPD

Wapen un Flagg

Dat Wapen von de Gemeen is in veer Feller deelt. Vörn baven is dat gollen, achtern baven rood, achtern ünnen gollen un vörn ünnen rood. Op de Feller leggt steiht en sülvern Lööw mit rode Tung.

Weertschop un Infrastruktur

Veerhöben hett en egene freewillige Füürwehr, de an’n 1. März 1938 grünnt worrn is.

Verkehr

Dör Veerhöben löppt de Kreisstraat 37, de in’n Noordwesten över Beborg un de Landsstraat 234 na Parrns an de L 215 ran geiht un in’n Süüdoosten na Westergellsen an de L 216. Lüttjere Straten gifft dat ans na Gastää un över Weddermööd un Sneed na Solzhusen.

De nächste Autobahn is de Autobahn 39 (Afsnidd Hamborg–Lümborg). De Opfohrten 3 Winsen-West un 4 Winsen-Oost doot so twölv Kilometer in’n Noordwesten/Noorden von Veerhöben liggen. Aver ok de Opfohrt 13 Thieshoop op de A 1 (Afsnidd Hamborg–Hannover) liggt blots 13 Kilometer in’n Noordoosten an de L 215.

De nächste Bahnhoff is so bi negen Kilometer wied weg in’n Noordoosten de Bahnhoff Radbrouk an de Bahnlien Hamborg–Hannover. Op de Bahnlien Winsen–Hützel hett dat von 1906 bet 1970 Personenverkehr geven. In disse Tied leeg de Bahnhoff Wulfsen söss Kilometer in’n Noordwesten.

Footnoten

Weblenken

Websteed von de Gemeen (hoochdüütsch)

Kategorie:Oort Kategorie:Landkreis Horborg