Johann Julius Conrad von Schlütter (* 25. Juli 1749 in Stood; † 11. April 1827) weer en düütschen Jurist.
Von Schlütter is 1749 as öllsten Söhn von Cornelia Charlotta, borene von Skölln (1733-1800), un den Justizraad Otto Diedrich Wilhelm von Schlütter (15. April 1710-14. Dezember 1786) in Stood boren.Bidrag von E. Schlüter in: Vaterländisches Archiv des Historischen Vereins für Niedersachsen. 1827, Sied 318ffRichard Graewe: Die zweihundertjährige Geschichte der Elb-Zoll-Fregatte zu Brunshausen und ihrer Kommandanten, 1650-1850. 1963, Sied 131 He hett toeerst Ünnerricht bi en Huuslehrer kregen un weer von 1764 af an op dat Gymnasium in Bremen. To Oostern 1764 hett he an de Universität Jena anfungen, Juristeree to studeren un is 1770 an de Universität Göttingen wesselt. He hett 1769 denn ok sien Studium afslaten. Na dat Studium is he in’n hannöverschen Staatsdeenst gahn. 1771 is he Auditer bi de Justizkanzlie Stood worrn un 1774 Justizraad un Hoffgerichtsassesser bi dat Hoffgericht Stood. An’n 31. Dezember 1781 hett he ok en Sitt un Stimm in dat Kunsistorjen Stood kregen. Toeerst außerordentlich, later denn ok en ordentlichen Sitt.
1795 is he Viezdirekter von de Justizkanzlie worrn. He weer von 1806 bet 1823 denn Direkter von de Justizkanzlie un dat Hoffgericht Stood. As in de Franzosentied dat Kurförstendom Hannover an dat Königriek Westfalen keem, is he 1810 Präsident von’n königlich westfäälschen Kriminalhoff in Stood worrn un weer von April bet Dezember 1810 Vörsitter von de Regeren von Bremen-Veern. As dat Rebeed von Bremen-Veern 1811 an dat Kaiserriek Frankriek fullen is, is von Schlütter Kaiserlichen Raad bi’n Kaiserlichen Gerichtshoff in Horborg worrn. As de Franzosen 1813 denn trüggslahn worrn sünd, is von Schlütter an’n 1. April na Stood gahn. An’n 6. Dezember 1813 hett he sien oold Amt as Direkter von Justizkanzlie un Hoffgericht wedder opnahmen. 1823 is he in Rohstand gahn, nadem dat mit de Gesundheit slechter warrn dee. He harr en poor Slaganfäll un is 1827 doodbleven.
He hett 1818 den Guelphenorden kregen. To sien 50. Deenstjubiläum an’n 7. September 1821 hett de Juristische Fakultät von de Universität Göttingen em den Ehrendokter tokennt.
Von Schlütter hett Agnese Juliane Sophie von Scharnhorst (1753-25. Januar 1828) freet, en Dochter von’n hannöverschen Generalmajor Andreas Wilhelm von Scharnhorst. De beiden harrn de Kinner Christiane Caroline Charlotte (8. März 1779-27. März 1780), Andreas Ludwig Wilhelm (31. Juli 1781-24. Februar 1863), Sophie Charlotte Wilhelmine Ernestine (* 8. November 1782), Gerlach Ernst Friedrich Carl (4. Mai 1785-22. Juni 1818) un Lisette Petroine (8. Mai 1790-1795).
Footnoten
Kategorie:Mann Kategorie:Jurist Kategorie:Boren 1749 Kategorie:Storven 1827