mini|Hans-Joachim Kulenkampff (1966) mini|Hans-Joachim Kulenkampff (1969)

Hans-Joachim „Kuli“ Kulenkampff (* 27. April 1921 in Bremen; † 14. August 1998 in Seeham, Öösterriek) weer en düütschen Schauspeler un Feernsehmoderater. He hett vun sik sülms meist seggt, he weer Quizmaster.

Leven Kulenkampff is as tweeten Söhn vun den Bremer Koopmann Friedrich Wilhelm Kulenkampff (1893-1964) boren wurrn. Sie Abitur hett he up dat Hermann-Böse-Gymnasium in siene Vaderstadt afleggt. Achterna hett he Schauspeel studeert an de Schauspeelschool vun dat Düütsche Theater Berlin. Dor is unner annern Agnes Windeck siene Lehrersche ween. Vun 1941 af an hett he in de Wehrmacht deent un hett in’n Tweeten Weltkrieg den Krieg gegen de Sowjetunion mitmaakt. Dor hett he mit egen Hand en poor Töhen afsneden, de doodfroren weern, un noch annere böse Saken mitmaakt.Der Spiegel: Ein Mozart des Plaudertons, schreven vun Nikolaus von Festenberg, 1998, Nr.35, Siet 9999 De Kriegsinsatz is en Tabu wurrn for em, wo he selten over snackt hett. Wenn he Kriegsfilme ut de 1960er Johre sehn hett, fung he an to weenen un hett den Ruum verlaten.Bericht vun Philipp Engel mit Vertellen vun Lüde ut Kulenkampff siene Familie in Kulturzeit, 6. April 2011 19:20, 3sat Sien Debüt as Schauspeler hett he 1943 an dat Bremer Schauspeelhuus geven. Ok an Theaters in Öösterriek un in de Swiez hett he speelt. Gegen Kriegsenn möss he in Berlin noch mol an de Front un is in brittsche Kriegsgefangenschop kamen. Vun 1946 af an is he regelmatig upträden in dat Lüttje Theater an’n Zoo (hüdigendags Fritz-Rémond-Theater) in Frankfort an’n Main. Sunnerlich goot is dat ankamen, as he den General Harras in Carl Zuckmayer sien Des Teufels General speelt hett.

Rundfunk, Film un Feernsehn 1950 hett Kulenkampff anfungen un hett bi den Hessischen Rundfunk anseggt. Dor höör he ok to dat Team vun den Frankforter Wecker mit to. An’n 29. August 1953 hett he bi de 18. Grote Düütsche Rundfunk-, Phono- un Feernsehutstellung in Düsseldorp losleggt mit siene eerste Show „Wer gegen wen?“. Dor is he vunwegen sien Charme un wiel he so leifig snacken konn een vun dat Publikum siene leevsten Moderaters mit wurrn. 1958 un 1961 hett Kulenkampff tohopen mit Heinz Ehrhardt in de Filme Immer die Radfahrer un Drei Mann in einem Boot speelt.

Quizmaster Vun 1964 af an hett Kulenklampff 43 mol de Quiz-Sennen Einer wird gewinnen (kort EWG nömmt) modereert. Ofschoonst he dor unbannig good mit ankamen is bi de Lüde, hett he dor avers 1969 eerst mol mit uphöört. Achterna hett he in allerhand Feernsehformate mitmaakt, dormank de Sunnavendavend-Speelshows Guten Abend, Nachbarn un Acht nach 8, un de Talkshow Feuerabend. De sund avers alltohopen wedder instellt wurrn, vunwegen dat de Lüde sik dor nich groot for intresseern döen. De ARD hett denn beslaten, de EWG nee up to leggen. Dat hett 1979 henhaut un is wedder goot ankamen bi’t Publikum. 1987 is de Sennen denn avers endgüllig utlopen. Kulenkampff harr vunwegen sien Oller nich mehr fuddermaken wollt, is dormols seggt wurrn.

Unverwacht hett Kulenkampff 1993 noch eenmol en Sunnavendavendshow overnahmen. Dat weer, as Wim Thoelke na veele Johre de Moderatschoon vun de ZDF-Quizshow Der Große Preis afgeven harr. Toeerst hett dat heten, Sabine Sauer scholl de Sennen maken. Dat ZDF hett sik dat denn avers anners overleggt un hett Kulenkampff beden. Dat hett Sauer eerst ut de Daagblöer höört. De Sennen is denn nich mehr up’n Dunnersdag, man up’n Sunnavend utstrahlt wurrn. Dor weer avers al allerhand los bi de Konkurrenz, denn ok de ARD hett parallel ehre groten Shows up’n Sunnavend lopen laten, un so hefft sik nich so veel Lüde de Show ankeken, as dat dacht wurrn weer. Kulenkampff hett de Sennen den na bloß man sess Utgaven wedder afgeven.

Nadem he en sware Operatschoon achter sik harrt hett, hett he 1997 un 1998 dreemol de Bildungsshow Zwischen gestern und morgen modereert. An un for sik scholl de uptekent weern un denn Sönndags an’n namiddag in de ARD lopen. Man Kulenkampff hett dor nich mitspeelt. He meen, dat gung nich anners, as dat de Saak „live“ utstrahlt wurr. Dor sünd denn de Süüddüütsche Rundfunk (SDR), de dat Leit harrt hett, de Oostdüütsche Rundfunk Brannenborg (ORB) un de Westdüütsche Rundfunk (WDR) overeen kamen, de Reege an’n Sunnavendavend in ehre drudden Programme ut to strahlen. Man dat weer denn doch to dannige Kost for de Tokiekers un so hett ut düsse Reege nich de Inschaltquoten hoolt, wo dat up afsehn weer. Tolest is se denn instellt wurrn. Dat schall Kulenkampff duchtig drapen hebben. Annere Saken Na dat Enn vun de EWG-Show is Kulenkampff 25 Johre lang jummers wedder mit datsülvige lüttje Tourneetheater up Gastspeelreisen gahn. Vun 1985 bit 1990 hett he meist 2000 siene Nachtgedanken vorbrocht, ehr dat de ARD denn Sendeschluss maakt hett. Vun 1990 bit 1991 hett he bi RTL plus de Literatur-Sennen Kulis Buchclub maakt. 1997 hett he in dat Twee-personen-Stück Mögliche Begegnungen vun Paul Barz as Georg Friedrich Händel dat leste Mol up’e Bühn stahn.

Familie thumb|Familiengraff Kulenkampff in Frauenstein 1946 hett Kulenkampff Gertraud (Traudl) Schwarz (1922–2001) freet. Se is later bekannt wurrn as Schrieversche vun Kinnerböker. Mit ehr hett he dree Kinner harrt: en Dochter Merle (*1949) un twee Söhns. Dat weern Till, nömmt „Burli“ (1953-1957) un Kai-Joachim (* 1959). Till is sturven, as siene Fro mit de Kinner 1957 vun en Ferienhuus na Huse fohren is un dat denn en slimmen Unfall geven hett. Anners, as siene Fro, hett Kulenkampff ok hier nich faken over snackt. Kulenkampff sien öllern Broder harr den Lehrstohl for Anatomie an de Universität vun dat Saarland. As Wahlheimat hett he in Seeham in Salzburg in Öösterriek leevt. Siene Urne is up den Karkhoff vun de Wallfohrtskarken Frauenstein (Gemeende Molln/Bezirk Kirchdorf an de Krems) in Böveröösterriek begraven wurrn. Interview mit Johannes Silberhuber, Pfarrer von Frauenstein. (upropen an’n 30. März 2012)

Filmografie (Utwahl) Johr Titel 1956 Bonjour Kathrin 1958 Immer die Radfahrer 1959 Immer die Mädchen 1959 Kein Mann zum Heiraten 1960 Sooo nicht, meine Herren 1961 Drei Mann in einem Boot 1969 Dr. med. Fabian – Lachen ist die beste Medizin 1974 Ay, ay, Sheriff, Feernsehn 1974 Das Spukschloß von Baskermore 1974 Ehrenhäuptling der Watubas, Feernsehn 1988 Münchhausens letzte Liebe, Feernsehn 1988 Starke Zeiten

Höörspeele 1949: Der Fall Axel Petersen (Axel Petersen) – Regie: Günter Siebert (Regisseur), mit Gillis van Rappard, Ludwig Hayn, Walter Jokisch, Traut Kutschka, Doris Hansen 1951: Familie Hesselbach, Folge: Der Weihnachtsgast - Regie: Karlheinz Schilling, mit Wolf Schmidt, Lia Wöhr, Joost Siedhoff, Sofie Engelke 1966: Rinaldo Rinaldini oder Der Räuberhauptmann (Christian August Vulpius) – Mehrteiler, 504 min., Regie: Friedhelm Ortmann, mit Louise Martini, Klausjürgen Wussow, Hansjörg Felmy, Günther Neutze, Peter Lieck, Nicole Heesters 1967: Der Herr Ornifle (von Jean Anouilh) (Graf Ornifle de Saint Oignon) – Regie: Hans Hausmann, mit Urs Bihler, Otto Mächtlinger, Anne-Marie Blanc, Maria-Magdalena Thiesing, Gertrude von Bastineller

Quizsennen in’t Feernsehn 1953–56: Wer gegen wen? 1956–57: Zwei auf einem Pferd 1957–58: Die glücklichen Vier 1958–59: Sieben auf einen Streich 1959–60: Quiz ahn Titel (na korte Tiet nömmt as Der große Wurf) 1961: Kleine Stadt – ganz groß 1964–87: Einer wird gewinnen 1971/72: Guten Abend, Nachbarn 1973: Acht nach 8 1975–76: Feuerabend 1977: Wie hätten Sie’s denn gern? 1993: Der große Preis 1997-98: Zwischen Gestern und Morgen

Wat he schreven hett Segeln lernen mit Hans Joachim Kulenkampff. Ein Kurs bis zum A-Schein. Heyne, München 1974, ISBN 3-453-41096-3.

Filmporträt Legenden - Hans-Joachim Kulenkampff. Porträt, Deutschland 2011, 43 Min. . Ein Film von Philipp Engel, hergestellt vom Hessischen Rundfunk.Legenden – Hans-Joachim Kulenkampff up daserste.de, afropen an'n 29. April 2012

Literatur över Kulenkampff Herzogenrath, Carola: Hans-Joachim Kulenkampff im deutschen Fernsehen. Charakteristische Formen der Moderation. Wissenschaftler-Verlag, Bardowick 1991. ISBN 978-3-89153-016-0 Kulenkampff, Hans Ludwig: Stammtafeln der Familie Kulenkampff (Osterholzer Zweig), Bremen 1968 Schmidt, Georg: Hans-Joachim Kulenkampff – Ein Bremer Junge Gebundene Ausgabe, Wartberg 2000. ISBN 978-3-86134-982-2

Utteknungen miniatur|Steern vun Hans-Joachim Kulenkampff up den Boulevard der Stars in Berlin 1961 und 1966 – Bravo Otto – in Sülver as TV-Star männlich 1966 – Goldene Kamera in de Kategorie Beliebtester Fernsehstar (männlich) 1965 – Krawattenmann des Jahres 1969 – Bambi 1971 – Pfeifenraucher des Jahres 1980 – Saure Gurke – Trostpries „für seine altväterlich-charmante, auf keine Anzüglichkeit verzichtende Spielleitung“ 1985 – Adolf-Grimme-Pries 1987 – Goldene Kamera in de Kategorie Bester Showmaster 1987 – Goldener Gong for siene Sluss-Sennen ut de Reege Einer wird gewinnen 1994 – Romy Platin Romy für das Lebenswerk ???? – Goldener Bildschirm 5× Gold 2010 – Steern up den Boulevard der Stars in Berlin

Weblenken

Realplayer-Stream NDR-Talkshow 15. und 29. Januar 1988 WDR-Reportage zum 10. Todestag Hans-Joachim Kulenkampffs

Belege

Kategorie:Feernsehn Kategorie:Schauspeler Kategorie:Grimme-Pries Kategorie:Quizmaster Kategorie:Bremen Kategorie:Mann Kategorie:Boren 1921 Kategorie:Storven 1998 Kategorie:Börger von Düütschland