Nordahn is en Dörp in de Gemeen Mittelsnohn in’n Landkreis Cuxhoben, Neddersassen.

Geografie

In’n Noordwesten von dat Dörp liggt de Balksee. An Nordahn doot de beiden Beken Lembeek (in’n Noorden) un Ohrensbeek (in’n Süden) vörbifleten. De Lembeek kummt von’n Westerbarg un münnt in’n Noordwesten von Nordahn in’n Ohrensbeek. De Ohrensbeek wedder münnt in’n Balksee.

De Naveröörd sünd Varrel in’n Noorden, Heeßel, Wohlenbeek un Rahden in’n Oosten, Loomst in’n Süüdoosten, Mittelsnohn in’n Süden, Stinst in’n Westen un Boomoor un Eekhoffsbarg in’n Noordwesten.

Historie

In de Oorkunnen kummt de Oort toeerst 986 vör.

In’n Eersten Weltkrieg sünd fiev Soldaten ut Nordahn fullen oder vermisst un in’n Tweten Weltkrieg 27http://www.denkmalprojekt.org/dkm_deutschland/nordahn_mittelstenahe_ns.htm.

In de Franzosentied von 1810 bet 1814 hett de Oort to de Mairie Loomst in’n Kanton Bremervöör höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Nordahn is an’n 1. Juli 1972 mit de Gemeen Mittelsnohn tohoopleggt worrn.

Inwahnertall

Religion

Nordahn is evangeelsch-luthersch präägt un höört to dat Kaspel von de Bartelmees-Kark in Loomst.

För de Kathoolschen is de St.-Ansgar-Kark in Warstood tostännig, de siet 2010 Deel von de Karkengemeen Hillig Geist in Stood is.

Wapen

Dat Wapen von Nordahn wiest op gollen Grund twee swarte, rood bewehrte Borenklauen, de na baven un na buten richt sünd. Ünner de Klauen is dat gröne Bladd von en Lebberbloom to sehn.

De Borenklauen kaamt ut dat Wapen von de Greven von Heien. Dat wiest dor op hen, dat in dat 13. Johrhunnert de Greven von Heien de Vaagdie Ahn as Lehn an de von Brobargen vergeven hebbt. De Lebberbloom wiest op’t Nordahner Holt hen, in dat düsse Bloom noch vörkummt.

Kultur

In Nordahn gifft dat en Denkmaal för de Fullenen ut de twee Weltkrieg’.

Verenen

De Schüttenvereen Nordahn is 1908 grünnt worrn.

Weertschop un Infrastruktur

Nordahn hett en egene freewillige Füürwehr, de an’n 30. März 1912 grünnt worrn is. Vörher hett dat en Plichtfüürwehr geven. Dat aktuelle Sprüttenhuus is 1958 boot worrn.

Verkehr

Nordahn liggt an de Kreisstraat 29, de in’n Noorden na Varrel un Westersood löppt un in’n Süden na Mittelsnohn an de Landsstraat 116 ran. En lüttjere Straat geiht ans in’n Oosten na de K 21 ran, de in’n Süüdwesten na Loomst löppt.

De nächste Bahnhoff is de Bahnhoff Hemmoor an de Nedderelvbahn.

Literatur

Heinrich E. Hansen: Nordahn: Ein Dorf in der Börde Lamstedt. 1986

Footnoten

Weblenken

Kategorie:Oort Kategorie:Landkreis Cuxhoben