Nindörp () is en Dörp in de Gemeen Drochters in’n Landkreis Stood, Neddersassen.

Geografie

Dat Dörp liggt in Keden un in de Masch in’n Süüdwesten von de ole Wischhobener Süderelv un de Elvinsel Kruutsand. Von de richtige Elv is de Oort so bi dree Kilometer af. Na Süüdwesten slütt sik dat Kedener Moor an.

De Naveröörd sünd Doornbusch in’n Noordwesten, Kruutsand in’n Noorden, Gauensiekersand in’n Oosten, Theisbrügg un Drochters in’n Süüdoosten, Theisbrüggermoor un Aschhoorn in’n Süüdwesten un Doornbuschermoor in’n Westen.

Historie

Nindörp kummt 1124 as Nendorp toeerst in en Oorkunn von Rudolf I. vör, de Land in dat Dörp an dat Klooster Harsfeld schenkt hett. 1289 kummt de Oort wedder in de Oorkunnen vör, as he Deel von dat Kaspel Drochters warrt.

Verwaltungsgeschicht

In de Franzosentied von 1810 bet 1814 hett de Oort to de Mairie Drochters in’n Kanton Freeborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to dat Grevengericht Bützfleet tohöört un denn von 1852 bet 1859 to dat Amt Wischhoben. Von 1859 bet 1885 weer dat in dat Amt Freeborg un na 1885 in’n Kreis Keden. 1932 is dat Deel von’n Kreis Stood worrn.

De Oort is al in dat 19. Johrhunnert Deel von de Gemeen Drochters worrn. An’n 1. Juli 1972 sünd de Gemenen Drochters, Hüll un Aßel mit de Gemeenreform in Neddersassen tohoopgahn un hebbt de ne’e un gröttere Gemeen Drochters billt.

Inwahnertall

Religion

Nindörp is evangeelsch-luthersch präägt un höört to dat Kaspel von de Johannis- un Katharinen-Kark in Drochters.

För de Kathoolschen is de Hillig-Geist-Kark in Stood tostännig.

Weertschop un Infrastruktur

Verkehr

Nindörp liggt an de Landsstraat 111, de ok Obstmarschenweg heet un in’n Süüdoosten över Drochters na Stood un in’n Noordwesten na Wischhoben un an de Bundsstraat 495 löppt. In’n Süüdwesten löppt de Kreisstraat 27 na Doornbuschermoor.

De nächste Autobahn is de Autobahn 26 (Afsnidd Stood–Hamborg). De Opfohrt 3 Stood-Oost liggt so 21 Kilometer in’n Süüdoosten von Nindörp an de L 111. Dat gifft Plaans, dat de A 26 bet Drochters wiederboot warrt un dor op de A 20 drippt, de ok noch nich boot is. Dat Dreeeck Drochters schall denn üm un bi fiev Kilometer wied weg ween.

De nächste Bahnhoff is so bi 16 Kilometer wied weg in’n Süden de Bahnhoff Hammoh an de Nedderelvbahn von Cuxhoben na Hamborg. Von 1899 bet 1933 harr dat Dörp ok en Bahnhoff an de Kedener Kreisbahn.

Scholen

De Kinner ut’n Oort gaht na de Grundschool Doornbusch op School.

Footnoten

Kategorie:Oort Kategorie:Landkreis Stood