De Annakolibry (Calypte anna) is in fûgel út 'e famylje fan 'e kolibrys (Trochilidae). It is ien fan 'e meast foarkommende kolibrysoarten oan 'e westkust fan Noard-Amearika. De fûgel is ferneamd nei Anna Masséna (1802–1887), de hartoginne fan Rivoli.
Ferskining thumb|left|Mantsje. De Annakolibry is in middelgrutte kolibry mei in lingte fan likernôch 10 sintimeter en in gewicht fan 3 oant 6 gram. De fûgel hat in brûngriene rêch en in griiswite ûnderkant. It mantsje is maklik te werkennen oan 'e irisearjende, rôzereade fearren op 'e krûn en de kiel, dy't as in skobbich patroan oandogge. As it ljocht der net rjocht op falt, lykje dy dielen lykwols donker of sels swart. It wyfke hat griene boppedielen en is ûnder griis mei soms swarte fearkes oer de midden fan 'e kiel.
Fersprieding De Annakolibry komt foar oan 'e westkust fan Noard-Amearika, fan súdlik Kanada (Britsk-Kolumbia) oant Baja California yn Meksiko. Oarspronklik kaam de soarte benammen foar yn it suden, mar troch de oanplant fan net lânseigen planten en it brûken fan kolibryfoerbakken yn tunen hat de fûgel syn leefgebiet yn 'e 20e iuw bot nei it noarden ta útwreide. It is in kolibrysoarte dy't yn in grut part fan syn ferspriedingsgebiet it hiele jier troch bliuwt en winterdeis net nei it suden migrearret.
Ekology en gedrach thumb|left|Briedend wyfke. De fûgel libbet fan nektar út blommen en lytse ynsekten of spinnen. De Annakolibry is ferneamd om de spektakulêre dûkflecht fan it mantsje by de balts. Hy fljocht dan oant wol 30 meter de hichte yn en dûkt mei in geweldige faasje nei ûnderen, wêrby't er oan it ûnderste punt fan 'e dûk in lûd tsjirplûd makket mei syn sturtfearren.
It wyfke bout it nêst fan plantemateriaal en koarstmoas. Spinreach wurdt brûkt om it materiaal byinoar te hâlden. in lechsel bestiet hast altiten út twa wite aaikes, sa grut as lytse beannen, dy't fan 14 oant 19 dagen útbret wurde. De pykjes wurde troch it wyfke fuorre mei nektar en lytse ynsekten. Nei likernôch 18 oant 23 dagen kinne de jonge fûgels útfleane. Mantsjes binne polygaam en ferlitte it wyfke fuort wer nei it pearjen.
By kâld waar kin de Annakolibry him skyndea (torpor) hâlde om enerzjy te besparjen. De lichemstemperatuer sakket dan bot en de stofwikseling wurdt fertrage.
Status en bedrigingen De Annakolibry stiet op 'e Reade list fan 'e IUCN as 'net bedrige' (Least Concern). De populaasje is de lêste desennia sels tanommen, mei tank oan 'e oanpassing fan 'e fûgel oan minsklike omjouwings lykas tunen en parken.
Kategory:Fûgelsoarte Kategory:Burdkolibry Kategory:Lânseigen fauna yn Alaska Kategory:Lânseigen fauna yn de Feriene Steaten Kategory:Lânseigen fauna yn Kanada Kategory:Lânseigen fauna yn Meksiko