De Afrikaanske dwerchspjocht (Verreauxia africana) is in fûgel út de famylje fan 'e spjochten (Picidae).
Taksonomy Yn it ferline waard de fûgel ta it skaai Sasia rekkene en guon dogge dat noch. De bruorren Jules en Édouard Verreaux beskreane de fûgel yn 1855 as Sasia africana oan 'e hân fan in eksimplaar út Gabon, West-Afrika. In jier letter sette de Dútske ornitolooch Gustav Hartlaub de fûgel yn it monotypyske skaai Verreauxia. Dat krige doe net in soad neifolging, mar molekulêr DNA-ûndersyk liet yn 2017 sjen dat it setten yn in apart skaai te ferdigenjen wie, sadat it fûgeltsje jimmeroan faker yn it aparte skaai Verreauxia set wurdt. Der binne gjin ûndersoarten fan erkend.
Beskriuwing De dwerchspjocht is in knobsk fûgeltsje fan 9 oant 10 sm mei in koart sturtsje. It boppebealchje fan it fûgeltsje is oliifgrien mei wat giel. De fleugels en de sturt binne oliifkleurich en brún. De kiel en it boarst binne griis, de búk wat ljochter griis. Om it each is de hûd read en hat de fûgel gjin fearkes en boppe it read om it eachje rint in wyt streekje. Ek de poatsjes binne readeftich. De dwerchspjocht hat in swarte snaffel. Jonge fûgels binne net safolle oars, der sitte allinne mear grize en okerkleurige tinten yn it fearrekleed.
Iten De fûgel siket syn iten yn strûken en tichte begroeiing en yn de legere dielen fan beammen. Mei syn snaffel wit er skuorren te meitsjen yn it hout om by keverlarven te kommen. Hy yt ek ynsekten, mar liket net sljocht te wêzen op mychammels.
Nêst Tusken juny en febrewaris wurdt der bret en it nêst fan 'e Afrikaanske dwerchspjocht is maksimaal fiif meter fan 'e grûn. Der wurde twa aaikes lein en beide âlders bringe de jonge fûgels grut.
Fersprieding De fûgel libbet yn Gana, Ivoarkust, Nigearia, Angoala, Kameroen, de Sintraal-Afrikaanske Republyk, de Republyk Kongo, de Demokratyske Republyk Kongo, Ekwatoriaal-Guinee, Gabon en Uganda.eBird De soarte hat in grut ferspriedingsgebiet en is lokaal algemien.
De Afrikaanske dwerchspjocht libbet yn sekundêr bosk yn leechlân. It is in warber fûgeltsje, dat faak yn pearkes fan it iene nei it oare plak fleant en him somtiden by oare groepen fûgels foeget.
Status De soarte is lokaal algemien yn in grut ferspriedingsgebiet en wurdt dêrom troch de IUCN as net bedrige kategorisearre.
Kategory:Fûgelsoarte Kategory:Spjocht Kategory:Lânseigen fauna yn Angoala Kategory:Lânseigen fauna yn Ekwatoriaal-Guinee Kategory:Lânseigen fauna yn Gabon Kategory:Lânseigen fauna yn Gana Kategory:Lânseigen fauna yn Guinee Kategory:Lânseigen fauna yn Ivoarkust Kategory:Lânseigen fauna yn Kameroen Kategory:Lânseigen fauna yn Kongo (Demokratyske Republyk) Kategory:Lânseigen fauna yn Kongo (Republyk) Kategory:Lânseigen fauna yn Libearia Kategory:Lânseigen fauna yn Nigearia Kategory:Lânseigen fauna yn de Sintraal-Afrikaanske Republyk Kategory:Lânseigen fauna yn Uganda