De echte bearen (wittenskiplike namme: Ursus) foarmje in skaai fan 'e klasse fan 'e sûchdieren (Mammalia), it skift fan 'e rôfdieren (Carnivora), it ûnderskift fan 'e hûndieren (Caniformia), it tuskenskift fan 'e poalrôfdieren (Arctoidea), de boppefamylje fan 'e beardieren of beareftigen (Ursoidea), de famylje fan 'e bearen (Ursidae) en de lyknammige ûnderfamylje fan 'e echte bearen (Ursinae). Ta dit skaai hearre 4 libbene soarten bearen, dy't foarkomme yn Jeraazje en Noard-Amearika, mei dêropta in hantsjefol útstoarne soarten. De libbene soarten binne de brune bear (Ursus arctos), de Amerikaanske swarte bear (Ursus americanus), de Aziatyske swarte bear of kraachbear (Ursus thibetanus) en de iisbear (Ursus maritimus). Fan 'e útstoarne soarten is de reuseftige mar fegetaryske hoalebear (Ursus spelaeus) it bekendst, dy't oant de lêste iistiid yn Jeropa foarkaam.
Besibskip By guon taksonomyske yndielings wurde alle libbene soarten fan 'e echte bearen ûnderbrocht yn aparte ûnderskaaien. Dêrby giet it om Ursus foar de brune bear; Euarctos foar de Amerikaanske swarte bear; Selenarctos foar de Aziatyske swarte bear; en Thalassarctos foar de iisbear. Dy yndieling is lykwols net gongber. Fan 'e fjouwer oare libbene bearesoarten binne de lippebear (Melursus ursinus) en de hunichbear (Helarctos malayanus) nei alle gedachten it naust besibbe oan 'e echte bearen. De oare beide soarten, de brilbear (Tremarctos ursinus) en de reuzepanda (Ailuropoda melanoleuca) binne folle minder nau mei de echte bearen besibbe.
Soarten
skaai echte bearen (Ursus) Amerikaanske swarte bear (Ursus americanus) Auvernjebear (Ursus minimus) † Aziatyske swarte bear (Ursus thibetanus) brune bear (Ursus arctos) deningerbear of Deningers bear (Ursus deningeri) † Etruskyske bear (Ursus etruscus) † Gamsulzengrotbear (Ursus ingressus) † Gran Dolinabear (Ursus dolinensis) † hoalebear (Ursus spelaeus) † iisbear (Ursus maritimus, foarh. Thalarctos maritimus) macfarlanebear of MacFarlane's bear (Ursus inopinatus) † (ûndúdlik oft dit in autintike soarte is) Pleistoseenske lytse hoalebear (Ursus rossicus) † Ursus abstrusus † Ursus arvernensis † Ursus sackdillingensis † Fierders bestiet der ek in seldsume, mar natuerlik foarkommende krusing tusken de grizzlybear (in ûndersoarte fan 'e brune bear) en de iisbear. Yn it Ingelsk wurdt nei sokke krusingen ferwiisd mei de nammen pizzly, prizzly en grolar bear, dat gearlûkings binne fan grizzly bear en polar bear ("iisbear"). De offisjele namme fan sokke krusingen is grizzly-iisbearkrusing.
Kategory:Sûchdiereskaai Kategory:Bear