Ellemieke Vermolen (folút: Ellemieke Elisabeth Cathriene Vermolen; Hellefuotslûs, 13 oktober 1976) is in Nederlânsk model, aktrise en presintatrise, dy't yn 2000 lanlike bekendheid krige doe't hja de rol fan Bo Donkers spile yn 'e soapsearje Goudkust.
Karriêre Vermolen die nei de MAVO in trijejierrige siktaresseoplieding by it Schoevers-ynstitút. Neitiid fûn se wurk as model, en sa ferskynde se bgl. yn reklamespotsjes fan C&A en Amstel. Troch dy spotsjes kaam hja yn kontakt mei Joop van den Ende, dy't har in baan oanbea by it programma Millenniumspel, op RTL 4. Fia fia krige Vermolen doe de rol fan Bo Donkers yn 'e soapsearje Goudkust, op SBS 6, taspile.
Fan septimber 2002 ôf presintearre Vermolen it spulprogramma Puzzeltijd, op RTL 4. Yn maart 2003 stapte se oer nei SBS, dêr't se ferskate programma's presintearre, wêrûnder Klussen en Wonen, Exclusief en Mama, Ik Heb Je Huis Verbouwd. Letter wie se ek te sjen yn Shownieuws en Huizenjacht.
Ellemieke Vermolen waard yn 2005 troch it tydskrift FHM útkard ta de meast seksy frou fan Nederlân. It jiers dêrop die se mei oan it realitytillefyzjeprogramma Sterren Dansen op het IJs, wêryn't se by in skate-off mei âld-reedrider Hein Vergeer útskeakele waard en in fyfde plak helle. Yn 2007 naam Vermolen in duët mei sjonger Gerard Joling op, mei as titel Liefde. Oant augustus 2011 presintearre se it oersichtsprogramma De 25, op SBS 6.
Priveelibben Vermolen troude yn 1998 mei muzykprodusint John Ewbank, mar dat houlik rûn in jier letter al op in skieding út. Yn 2006 hie hja in hoartsje in relaasje mei sjonger Jan Smit. Yn 2007 lei se it oan mei topkok Sergio Herman, mei wa't se op 11 septimber 2008 troude. Mei him hat se twa soannen, dy't berne binne yn 2009 en 2010.
Keppelings om utens Biografy en filmografy fan Ellemieke Vermolen yn de Internet Movie Database (IMDb)
Kategory:Nederlânsk model Kategory:Nederlânsk telefyzjepresintator Kategory:Nederlânsk telefyzje-akteur Kategory:Nederlânsk sjonger Kategory:RTL Nederlân-wurknimmer Kategory:SBS Broadcasting-wurknimmer Kategory:Dielnimmer oan in Nederlânsk realitytelefyzjeprogramma Kategory:Persoan berne yn 1976