David Johannes Coetsee is ’n Afrikaanse skrywer en dramaturg.Wisselvorme van hierdie skrywer se naam kom algemeen voor. “David” en “Dawid” word in verskillende bronne aangedui, asook “Coetsee” en “Coetzee”, met alle moontlike kombinasies wat voorkom. Dit bemoeilik betekenisvolle navorsing. Die naam wat hier gebruik word is dié waaronder “Armoede en hartkwaal” gepubliseer is, met die veronderstelling dat die uitgewer hopelik die skrywer se naam akkuraat sou weergee. Hy is op 11 Februarie 1905 gebore en ontgin in sy skryfwerk veral die armblanke-vraagstuk van die dertigerjare.
Skryfwerk Die roman “Armoede en hartkwaal”Malherbe, François “Nuwe Brandwag” Deel 5 no. 4, November 1933 skets die bywonerslewe met ’n realistiese uitbeelding van hierdie mense se lewens en taalgebruik, met die “hartkwaal” as die armblanke se gebrek aan moed, wat slegs deur die liefde van sy mede-Afrikaner genees kan word. Oom Kalie Venter is ’n vooruitstrewende boer wat onvermoeid sy plaas bewerk en uitbou. As ouderling voel hy verplig om in sy wyk die evangelie van die arbeid te verkondig. By die Swanepoel-familie kry oom Kalie egter die wind van voor, want hulle het die hartkwaal baie erg. Die vader, Faan Swanepoel, weier om die studiebeurs wat oom Kalie vir sy seun Hans kry te aanvaar, want hy wil nie hê dat sy seun moet leer en hom dan later verag nie. Dan word Oom Kalie getref deur ’n ramp en verloor baie geld. Deur selfondersoek besef hy dat sy doelwit die najaag van rykdom was, eerder as dat hy die Here as anker in sy lewe gehad het. Hy gaan weer hard werk, maar nie net om ryk te wees nie, maar om gelukkig te wees. In sy probleme besef hy ook dat sy armblanke bure nie ’n anker in die lewe het nie en daarom so mismoedig is. Gewapen met nuutgevonde lewenswysheid gaan oom Kalie weer op huisbesoek en los nou die probleme met sy bure op. Die skrywer slaag daarin om die sielkundige en godsdienstige aspek van die armblanke-vraagstuk vas te vat en te beklemtoon. Die drama “Agterstevoorboerdery” beeld ook die armblankes uit. In hierdie drama wil ’n jong man moderne boerderymetodes invoer teen sy pa se wense. In 1928 stel hy ’n manuskrip van “Gedigte” saam wat hy voorlê vir beoordeling van die Hertzogprys, maar sy gedigte word nooit gepubliseer nie.
Publikasies JaarPublikasies1930Geskiedenisstories uit alle tye1932Agterstevoorboerdery1933Agterstevoorboerdery
Bronnelys
Boeke Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970 Kannemeyer, J.C. “Geskiedenis van die Afrikaanse literatuur 1” Academica, Pretoria en Kaapstad Tweede druk 1984 Nienaber, P.J. “Die Hertzogprys Vyftig Jaar” Nasionale Boekhandel Kaapstad Eerste uitgawe 1965 Nienaber, P.J,; Senekal, J.H en Bothma, T.C. “Mylpale in die geskiedenis van die Afrikaanse letterkunde” Afrikaanse Pers-Boekhandel Tweede hersiene uitgawe 1963 Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969 Schoonees, P.C. “Die prosa van die tweede Afrikaanse beweging” J.H. de Bussy, Pretoria / Hollandsch- Afrikaansche Uitgevers Maatschappij v/h J. Dusseau & Co, Kaapstad 1939 (derde druk) Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998
Internet Esaach: http://www.esaach.org.za/index.php?title=Coetzee,_Dawid_J
Resensies en notas
Kategorie:Afrikaanse skrywers Kategorie:Suid-Afrikaanse dramaturge Kategorie:Geboortes in 1905