Ariarathes IV Eusebes (Grieks: Ἀριαράθης Εὐσεϐής) was van 220 v.C tot 163 v.C koning van Kappadosië. Hy was die seun van koning Ariarathes III en was nog ’n kind toe hy die troon bestyg het. Hy het sowat 57 jaar lank regeer.Justinus, Polybius
Hy was getroud met Antiochis, die dogter van Antiochus III van Sirië en het sy skoonpa gehelp in sy oorlog teen die Romeinse Republiek. Ná Antiochus se nederlaag teen die Romeine in 190 v.C., het Ariarathes in 188 v.C. vrede gevra. Hy het dit op gunstige voorwaardes gekry omdat sy dogter Stratonice verloof was aan Eumenes II, die koning van Pergamon, ’n bondgenoot van die Romeine. Sy is later met hom getroud. In 183 v.C. tot 179 v.C. het Ariarathes vir Eumenes gehelp in sy oorlog teen die koning van Pontus.
Volgens oorlewering het Antiochis aanvanklik geen kinders vir Ariarathes gebaar nie en toe voorgegee sy het die lewe aan twee seuns geskenk. Hulle is Ariarathes en Orophernes genoem. Daarna het sy egter twee dogters en ’n seun, Mithridates (die latere Ariarathes V) by haar man gehad. Sy het toe erken dat sy gejok het oor die eerste twee seuns en hulle is weggestuur, die een na Rome en die ander na Ionië.Livy, Polybius, Appian
Verwysings
Bronne Appian, The foreign wars, Horace White (vertaler), New York, 1899 Hazel, John; Who's Who in the Greek World, "Ariarathes IV", 1999 Head, Barclay; Historia Numorum, "Cappadocia", 1911 Justinus; Epitome of Pompeius Trogus, John Selby Watson (vertaler); Londen, 1886 Livy; Ab urbe condita, Canon Roberts (vertaler); New York, 1905 Polybius; Histories, Evelyn S. Shuckburgh (vertaler); Londen – New York, 1889 Smith, William (red.). Dictionary of Greek and Roman Biography and Mythology, "Ariarathes IV" , Boston, 1867 20px|linksHierdie artikel is vertaal vanuit die Engelse Wikipedia
Kategorie:Konings van Kappadosië