Jorge Alberto Francisco Valdano Castellanos (gebore 4 Oktober 1955) is ’n voormalige Argentynse sokkerspeler en afrigter. Bygenaamd “Die Filosoof van Sokker”, het hy as ’n voorspeler (aanvaller) gespeel.
Valdano het saam met die Argentynse nasionale span aan die Copa América in 1975, asook aan die FIFA Wêreldbekertoernooie in 1982 en 1986 deelgeneem, met Argentinië wat laasgenoemde gewen het. Hy het ’n groot rol in die 1986-oorwinning gespeel deur vier doele in die toernooi aan te teken, insluitend Argentinië se tweede doel teen Wes-Duitsland in die eindstryd. In totaal het hy tussen 1975 en 1990 23 keer vir sy land gespeel en sewe doele aangeteken.
Hoewel hy aanvanklik vir Newell's Old Boys, Alavés en Real Zaragoza gespeel het, was sy mees suksesvolle tydperk op klubvlak by Real Madrid, waar hy die Copa de la Liga (1985), La Liga (1986, 1987), asook twee opeenvolgende UEFA-bekers (1985, 1986) gewen het. As speler is hy in 1988 gedwing om sy loopbaan te beëindig nadat hy hepatitis opgedoen het.
As afrigter het hy Spaanse spanne soos Tenerife, Real Madrid en Valencia afgerig. Hy het Real Madrid in 1995 na die Liga-titel gelei. Na sy afrigterloopbaan het hy boeke geskryf, lesings oor leierskap gegee en as kommentator vir die Katarse TV-kanaal beIN Sports gewerk.
Verwysings
Eksterne skakels
Kategorie:Argentynse sokkerspelers Kategorie:Sokkerafrigters Kategorie:Geboortes in 1955 Kategorie:Lewende mense