Hierdie artikel handel oor die etniese groep. Vir die taal, sien Nogai.
Die Nogais (Nogai: ногайлар) is 'n Turkiese etniese groep wat inheems aan Suidwes-Rusland is. Hulle praat Nogai, 'n taal wat tot die Kiptsjakse groep behoort en in 'n groot mate wedersyds verstaanbaar met Kasaks is. Anders as baie van Rusland se etniese minderhede, het die Nogais nie hul eie federale deelgebied nie.
Die hoogste konsentrasie van Nogai-bevolking is in die Kaukasus-republieke Dagestan en Karatsjai-Tsjerkessië, waar administratiewe rajons met die naam "Nogai" bestaan. Baie Nogais woon ook in Stawropol-krai, wat tussen die twee republieke lê. Die Nogai-bevolking van Astrachan-oblast en Kalmikië word in drie afsonderlike groepe onderverdeel wat atipiese dialekte praat en sterk plaaslike identiteite het.
Verwysings
Kategorie:Etniese groepe in Rusland Kategorie:Turkiese volke