Botswana is een Binnenstaat in den Süden vun Afrika. Dat Land grenzt in’n Süüdoosten un Oosten an Süüdafrika, in’n Westen un Norden an Namibia un in’n Noordoosten an Sambia un Simbabwe. Bi Kazungula in’n Noordoosten dreept sik de Grenzen vun Namibia, Sambia un Simbabwe an een Punkt in de Midden vun den Sambesi.
De Naam De Naam Botswana kümmt vun dat Volk vun de Batswana vun her, dat hier un in de Länner dor umto to Huse weer.
Inwahners In Botswana leevt bi 1,8 Mio. Inwahners up 582.000 km². Dat gifft verscheden Völker in dat Land, dormank de Sotho mit bi 75,5%, de Shona mit 12,4%, de Buschlüde (San) mit 3,4%, de Hottentotten (Khoi Khoi) mit 2,5%, de Ndebele mit 1,3% un 4,9% annere. Bi 2% vun de Inwahners stammt ut Europa.
Spraken Amtssprake is Engelsch. Ok in dat Parlament warrt up Engelsch verhannelt. De meisten Inwahners snackt unner’nanner avers Setswana (bi 90%), wat in de Grundschoolen ok Sprake vun’n Unnerricht is.
School un Bildung Botwana is en vun de wenigen Länner in de Welt, wo dat jummers noch keen Schoolplicht gifft. In de Hööftstadt Gabarone gifft dat ene Universität mit bi 3.400 Studenten.
Religion Traditschonelle heidnische Religion: 49,2%. Protestanten: 29%. Afrikaansche Christenlüde: 14%. Röömsch-kathoolsche Kark: 9,4%. Annere: 0,6%.
Historie Vör de Kolonialtied geev dat in dat hüdige Botswana en Reeg vun lüttjere Königrieken vun de Batswana-Völker. As de Buren vun Süüdafrika her in dat Land kamen sünd, hefft düsse Königrieken Grootbritannien üm Hölpe anropen. Dat duer nich lang un Grootbritannien hett Schutzverdräge mit jem afslaten. Vun 1885 bit 1966 weer dat Land unner den Naam „Bechuanaland“ de Briten ehr gröttstet Protektorat in den Süden vun Afrika. An’n 30. September 1966 is dat Land unafhängig wurrn. Botswana is Liddmaat in den Commonwealth.
Weblinks
Kategorie:Land Kategorie:Afrika Kategorie:Botswana