mini|Edward Hopper (1937) mini|Ünnerschrift vun Edward Hopper Edward Hopper (* 22. Juli 1882 in Nyack, New York; † 15. Mai 1967 in New York City, New York) weer en US-amerikaansch Maler vunn den Amerikaanschen Realismus. Hopper sien in köhl Farvgeven hollen realistische Biller wiesen up de Eensamkeit vun den modernen Minschen un de Leere vun dat modern Leven hen. Dat Motiv vun de Eensamkeit is dat för völ Betrachter offensichtlichste un ok vun Kritikern faken betonte zentrale Motiv vun de Warken vun Hopper. Up de anner Siet forder Hopper sülvst dorto up, dissen Aspekt bi de Interpretatschoon vun sien Warken nich to düchtig to betonen: The loneliness thing is overdone. https://www.edwardhopper.net/, afropen an'n 25. September 2013. He gellt as Chronist vun de US-amerikaansch Zivilisatschoon.
Biographie Jöögd un Utbillen mini|Gebortshuus vun Edward Hopper in Nyack, New York
Edward Hopper wurr 1882 in Nyack, New York, as tweet Kind vun Garret Henry Hopper un Elizabeth Griffiths Smith Hopper boren, de Familie weer baptistisch, de Vader bedreev en lütten Textil- und Körtwarenladen. Hopper weer vun engelsch-nedderlannsch-walisisch Afstammen. Sien Süster Marion wurr twee Johr vör hüm boren. As de meest Kinner hett he sück mit Teeknen befaat, wobi he sien Teknungen af dat teihnt Levensjohr signeeren dee. He harr den Wunsch, Künstler to wurrn, un sien Öllern harrn nix dorgegen. De Blick up den Hudson River führ dorto, dat he sück för Bööt un Rennyachten begeistern dee. In dat Öller vun 15 Johren hett he sück en lütt Segelboot („Catboat“) baut. Wiel de jung Hopper ok dat Segeln geern much, hett he en Karriere as Marinearchitekt in Betracht trucken. Edward Hopper sien Interesse an de amerikaansch Architektur fung all in de Kindheit an un hull wiels sien gesamt Karriere an.
1899 hett he de High School afslooten. Van 1900 bit 1906 studeer he an de New York School of Art (hüüd Parsons School of Design) dat Fack Illustratschoon bi Frank Vincent DuMond un Arthur Keller as ok dat Fack Maleree bi William Merritt Chase, Kenneth Hayes Miller un Robert Henri, den Mentor vun de Ashcan School. Neben dat intensive Befaaten mit düütsch, franzöösch un russisch Literatur hemm besünners Maler as Diego Velázquez, Francisco de Goya, Gustave Courbet un Édouard Manet den jungen Künstler wichtige Orienteerenspunkte boden.
In de Johren 1906/1907 un 1909/1910 hett he mit finanziell Hülp vun sien Öllern Europa bereist un hett ünner annern Paris mit den Salon d’automne, sowie London, Brüssel, Amsterdam, Haarlem un Berlin besöcht. In Paris, wo he bi en franzöösch Familie leev, wurr de Leev to’n Impressionismus dör sien Studienkollegen Patrick Henry Bruce un Museumsbesöken waakt. Bruce hett hüm mit de Malern in Paris bekannt maakt. Hopper interesseer sück besünners för de Warken vun Pierre-Auguste Renoir, Alfred Sisley un Camille Pissarro. Sien tweet Europareise führ hüm in’n Mai un Juni 1910 nah Madrid und Toledo.
Arbeit as Illustrater mini|Edward Hopper in Paris (1907) Af 1905 hett Hopper as Illustrater för Warfagenturen (vör allen för C. C. Phillips & Co.), in dat eerst Johr in Deeltiet, later freeberoplich arbeit. Disse Tätigkeit, för dat Inkommen in de nächst 16 Johren wichtig, hett he aber nich as Deel vun sien künstlerisch Schaffen ansehn. Hopper kunn bit to sien 42. Levensjohr nich vun de Maleree leven. He hett sück an Utstellungen vun den vun Robert Henri leit McDowell Club bedeeligt, wo he mit Radeerungen sien eersten finanziellen Spood as Künstler harr. 1913 nehm he an de Armory Show in New York City deel un hett dor för 250 Dollar sien eerst Gemälde, Sailing verköfft. Dat weer dat eerste un för de folgend teihn Johr eenzig Gemälde, dat he verkoopen kunn. Siet 1914 weer Hopper Liddmaat vun den Whitney Studio Club, de vun Gertrude Vanderbilt Whitney grünnd wurrn weer. Sien Früen un Künstlerkolleeg Martin Lewis broch hüm 1915 de Technik vun de Radeerung bi. Af 1915 entstunnen eenige wenig bekannt Radeerungen. Hopper sülvst hett de Inführung as enorm wichtig för sien wiederes Wark betekent: „Nachdem ich mit dem Radieren angefangen hatte, kristallisierten sich meine Gemälde heraus.“ Wiels den Eersten Weltkrieg hett sück Edward Hopper as Plakatkünstler Anerkennung vun Updraggevern, Publikum un Kritik verdeent. Hopper wunn 1918 en Plakatwettbewarf vun de United States Shipping Board. In‘n Januar 1920, Hopper weer nu all 37 Johr olt, stellt he as Eenzelutsteller in den Whitney Studio Club Gemälde ut, de sien Früen, de Künstler Guy Pène du Bois, kurateeren dee. Af 1922 keemen eerste Artikel över hüm in Kunsttietschriften. Tietlevens droog Edward Hopper en Zettel in sien Jackentasch, up den he en Zitat ut en Breef vun Goethe schreven harr. Hopper harr in de School ok Düütsch lehrt. Dat Zitat luut: „Sieh Lieber, was doch alles Schreibens Anfang und Ende ist, die Reproduktion der Welt um mich, durch die innere Welt, die alles packt, verbindet, neuschafft, knetet und in eigner Form, Manier, wieder hinstellt, das bleibt ewig Geheimnis, Gott sei Dank, das auch ich nicht offenbaren will den Gaffern und Schwätzern.“ (Johann Wolfgang von Goethe in en Breef an Friedrich Heinrich Jacobi, 21. August 1774).
Eersten Spood as Maler 1915 hett Hopper in Gloucester (Massachusetts) de Malerin un Schauspelerin Josephine Verstille Nivison (nöömt „Jo“) kennen lehrt, de he an’n 9. Juli 1924 heiraadt hett. Se geev hör eegen Malerei wietgahnst up un wurr sien Lieblingsmodell, da an’n meesten in Hopper sien Biller wiest wurrd. Se weer dat ok, de sien Deelnahm an en internatschonalen Gruppenutstellung vun dat Brooklyn Museum of Art vermiddeln dee, de för Hopper den Dörbröök bedüüden dee. Dat Brooklyn Museum of Art hett dat Gemälde The Mansard Roof (1923) för 100 Dollar anköfft. Dat weer dat tweete Gemälde, dat Hopper verkoopen kunn. In dat Johr funn ok sien eerste kommerzielle Eenzelutstellung in de Galerie vun Frank Rehn statt, de bit to sien Levensenn’n sien Galerist bleev.
mini|De Wahnen vun Hopper in New York City, 3 Washington Square North Wiels de Weltwertschapskrise wurrr he in den USA en bekannt un anerkannt Maler. To’n Bispeel hett he 1929 twee Öölgemälde, 14 Aquarelle un 80 Graphiken för insgesamt 6.211 Dollar verköfft. De wertschapliche Spood stell sück eerst 1930 in, nahdem dat Museum of Modern Art un in dat folgend Johr dat Whitney Museum of American Art Biller vun Hopper köfft harr. 1933 all wies dat Museum of Modern Art en Retrospektive, de Alfred H. Barr in dat Museum of Modern Art in New York organiseeren dee. Se weer van’n 1. November bit to’n 7. Dezember 1933 apen. De Utstellung hett en apenlich Debatte utlöst, of Hopper sien Biller tatsächlich „modern noog“ weern, um in dat MoMA utstellt to wurrn. De Kritiker Clement Greenberg hett Hopper vörsmeeten, dat he en „schlechten Maler“ weer, de sien technische Untolänglichkeiten hüm allerdings to en „överleegen Künstler“ maaken deen. Hopper bewegte sich allerdings fernab der Diskurse „moderner“ Kunst.
In de Johren 1935 bit 1937 wunn he veer wichtig Priesen, denen völ wiedere folgen deen.
1941 hett he in’n Auto de Westküst vun de Vereenigte Staten bereist, 1943 folg de eerste Reis nah Mexiko. 1945 wurr he in de de American Academy of Arts and Letters wählt. 1950 wies dat Whitney Museum sien eerst groot Retrospektive, de ok in Boston un Detroit wiest wurr. In dat sülvig Johr kreeg he dat Ehrendoktorat vun dat Art Institute of Chicago. 1952 hett he mit dree anner Malern de USA bi de Biennale in Venedig vertreeden.
1960 hett sück Hopper utdrücklich gegen gen Vörherrschap vun de abstrakten Kunst in de dormalig Maleree wennd. In dat glieker Johr wies dat Wadsworth Atheneum in Hartford (Connecticut) en Utstellung vun sien Warken. 1962 geev dat en Retrospektive in dat Philadelphia Museum of Art; 1964 folg en tweete in dat Whitney Museum of American Art in New York. mini|Graffsteen Edward un Josephine H., Oak Hill Cemetery Nyack
Mit Two Comedians (in‘n Privatbesitz) hett Edward Hopper 1966 sien letzt Öölgemälde malt. Dat wiest den Maler un de sien Fru as Schauspeler, de sück jüst vun hör Publikum verafscheeden.https://www.fr.de/kultur/kunst/abschied-lebensbuehne-10952829.html
An‘n 15. Mai 1967 is Edward Hopper in sien New Yorker Atelier an den Washington Square storven, in dat he siet Dezember 1913 ahn Ünnerbreeken wahnt harr. Sien letzt Ruhestäe funn he twee Daag later in dat Familiengraff up den Oak Hill Cemetery (Karkhoff) in sien Gebortsoort Nyack, New York.Grab Edward Hopper bei knerger.de As Hopper 1967 storven is, harrn völ vun sien Biller ok in Europa all lang den Status vun Ikonen vun de Moderne.
Sien Fru Josephine is teihn Maand nah hüm an’n 6. März 1968 storven. Dat Paar weer ahn Kinner bleven.
Museen As Hopper dat wullt hett, fullen de Kunstwarken dem Whitney Museum of American Art in Manhattan to. Dat weern mehr as dreedusend Gemälde, Teknungen, Aquarelle un Graphiken. Dormit besitt dat Museum den weltwiet gröttsten Bestand vun Hopper sien Warken. Vun de Familie Sanborn, de mit Hopper befrüend weer, wurrn dem Whitney-Museum 4.000 Archivdokumente ut den Nahlaat vun Hopper schunken.Whitney-Museum bekommt Tausende Hopper-Dokumente. In: Hamburger Abendblatt. 31. Juli 2017, S. 15.
Utstellungen (postum) 1979 wurr de darte Retrospektive in dat Whitney Museum of American Art wiest. Deelen sünd dornah dör Europa wannert. 2004/2005 wurr ok weer in Europa en Quersnitt mit knapp 70 vun sien Arbeiten in London un dornah in Köln (Museum Ludwig, 358.000 Besöker) wiest. In de Londoner Tate Gallery wurr sien Wark dorbi in dree Maand vun 420.000 Besöker ankeeken. Bit Enn’n August 2009 funn in dat Bucerius Kunst Forum in Hamborg de Utstellung Modern Life. Edward Hopper und seine Zeit statt, de neben Hopper sien Warken ok Arbeiten vun sien Tietgenossen as Man Ray, Lyonel Feininger, Charles Sheeler un Georgia O’Keeffe wies. 2012/2013 wurr to’n eersten Mal in‘n Grand Palais in Paris en Retrospektive to Edward Hopper organiseert., visitparis-cultureguide.parisinfo.com, afropen an’n 28. Januar 2013. De Fondation Beyeler wies tüschen den 26. Januar un 17. Mai 2020 (verlängert bit 20. September) de Landschapen un Stadtlandschapen vun Hopper. Nicht o sehn weer allerdings dat ikonographische Wark Nighthawks, wiel de sien Bedüüdento licht de vun de anner Warken överstrahlen würr, so de Kuratur Ulf Küster. Bestanddeel vun de Utstellung weer en 3D-Körtfilm vun den Speelbaas Wim Wenders mit den Titel Two or Three Things I Know about Edward Hopper.
Wark un Themen Œuvre