Edward Cattouse (* 12. August 1892; † 6. Juli 1981 in Belize-Stadt) weer en Politiker ut Brietsch-Honduras (PUP).
Leven
Cattouse is 1892 as Söhn von Amy Belle, borene Wade (1872–?), un Edward Alexander Cattouse (1852–1923) boren.Personalities Caribbean. Personalities Limited, 1971, Sied 248 He weer op de Wesley Primary School un dat St. John’s Berchman College un hett later as Koopmann arbeidt.
He is 1908 in de British Honduras Volunteer Force intreden un hett von 1915 bet 1917 mit dat 1. Batalljon von de West India Regiments in Ägypten fuchten (Eersten Weltkrieg). Nadem he na Brietsch-Honduras trügg is, is he in’n Verwaltungsdeenst gahn un weer Bailiff un Crier bi’n Böversten Gerichtshoff von Brietsch-Honduras. He is 1920 bi dat Standsamt von Belize anstellt worrn, weer von 1929 af an Beamten bi’n Magistraat, denn von 1939 af an bi’n Toll un weer 1945 in de Revision.Belizean Biographies Von 1946 bet 1949 weer he Baas von dat Forest Department. 1950 is he as Beamten in Rohstand gahn.
An’n 29. April 1922 hett Cattouse Kathleen Doris Fairweather (1898–1989) freet. De beiden harrn acht Söhns un veer Döchter. Een von de Döchter weer Nadia Cattouse (* 2. November 1924), de in Grootbritannien as Schauspelerin un Sängerin bekannt worrn is.
Cattouse is an’n 6. Juli 1981 doodbleven un liggt op’n Lord Ridge Cemetery in Belize-Stadt begraven.
Politik
He weer Viez-Parteibaas von de People’s United Party (PUP).
Bi de Parlamentswahl in Brietsch-Honduras 1957 weer he Kannedaat för de PUP in’n Wahlkreis Belize West un hett de Wahl mit 57,4 % von de Stimmen gegen Leigh Richardson von de HIP un Lionel Francis von de NP wunnen.
Bi de Wahl 1961 is he as Kannedaat in’n Wahlkreis Collet antreden un hett sik mit 44,6 % von de Stimmen gegen Edward Flowers von de NIP un Mervin Hulse von de CDP dörsett. Ok bi de Wahl 1965 harr he in’n sülven Wahlkreis wedder de Bavenhand un hett mit 49,5 % gegen Edward Flowers von de NIP wunnen.
Dormit weer he von 1957 bet 1963 Afornten von de Legislativversammlung, ut de to’n 1. Januar 1964 dat Repräsentantenhuus worrn is. He is bet 1969 Afornten von dat Repräsentantenhuus bleven.
He weer in düsse Tied ok Minister för Lokale Verwaltung, Soziale Wollfohrt un Kooperativen, Minister för Apentliche Arbeiden, Energie un Verkehr un Viez-Premier ünner Premierminister George Cadle Price.
Ehren
Dat Albert Cattouse Building in Belize-Stadt is na em nöömt.
Footnoten
Kategorie:Mann Kategorie:Politiker (Belize) Kategorie:Börger von Belize Kategorie:Maat von de People’s United Party Kategorie:Maat von dat Repräsentantenhuus (Belize) Kategorie:Boren 1892 Kategorie:Storven 1981