Benninghöben () is en lütten Oort in de Gemeen Snevern in’n Landkreis Heidkreis, Neddersassen. Binnen de Gemeen höört de Oort to de polietsche Oortschop Häbe.

Geografie

De Oort liggt in de Lümbörger Heid un in dat Naturschuulrebeed Lümbörger Heid. Dat Water ut dat Rebeed flütt över de Brunau af.

De Naveröörd sünd Habenbeck-Bobendörp in’n Noorden, Behrn in’n Noordoosten, Steenkenhöben un Bissen in’n Süüdoosten, Timmerloh un Schaal in’n Süden, Häbe, Bockhäbe, Pietz un Möhr in’n Süüdwesten, Snevern in’n Westen un Wulfsbarg un Tütsbarg in’n Noordwesten.

Historie

Benninghöben bestünn to Anfang von dat 19. Johrhunnert blots ut twee Hööv, is denn aver to en lütt Dörp ranwussen, dat utgangs dat 19. Johrhunnert söven Hööv harr. Na düsse Tied is de Oort aver bilütten wedder lüttjer worrn. Dat leeg ünner annern dor an, dat de Vereen Naturschuulpark Hööv un Land in Benninghöben un ümto opköfft hett, üm dor den Naturschuulpark Lümbörger Heid intorichten.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Woltern in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Neenkerken in’n Kanton Wasra.

De Oort hett vör 1852 to de Amtsvaagdie Snevern in dat Amt Rodenborg tohöört un is in dat Johr denn in dat ne’e Amt Snevern wesselt. Dit Amt hett blots söven Johr bestahn. Von 1859 bet 1885 hett Benninghöben to dat Amt Soltau höört. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de siet 2011 Heidkreis heten deit.

De Oort höört von öllers bi de Gemeen Häbe mit bi, de an’n 1. März 1974 mit de Gemeenreform in Neddersassen Deel von de Gemeen Snevern worrn is. Sietdem höört Benninghöben binnen de Gemeen to de Oortschop Häbe, de en egen Oortsvörsteiher hett.

Inwahnertall

Religion

Benninghöben is evangeelsch-luthersch präägt un höört to dat Kaspel von de Fredenskark in Häbe. Düsse Kark is 1956 boot un 1961 egenstännige Karkengemeen worrn. Vörher hett de Oort to dat Kaspel von de Peter-un-Paul-Kark in Snevern tohöört.

För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.

Weertschop un Infrastruktur

För Benninghöben is de freewillige Füürwehr Häbe mit tostännig.

Verkehr

Benninghöben liggt aflegen in de Lümbörger Heid. Över de Kreisstraat 44 kummt een in’n Süden na Schaal an de Bundsstraat 3 un de Landsstraat 170. In’n Oosten kummt een na de K 51 un de L 211.

De nächste Autobahn is de Autobahn 7 (Afsnidd Hamborg–Hannover). De Opfohrt 43 Bissen liggt so fiev Kilometer in’n Süüdoosten von Benninghöben an de L 211.

De nächste Bahnhoff is so bi 13 Kilometer wied weg in’n Westen de Bahnhoff Snevern an de Heidbahn.

Scholen

De Kinner ut Benninghöben gaht in Snevern op de Grundschool an’t Pietzmoor.

Lüüd

De Maler Günther Weißflog hett von 1936 bet 1955 in Benninghöben leevt.

Footnoten

Kategorie:Oort Kategorie:Landkreis Heidkreis