duum|Dat ole Möhlengebüüd duum|Graffsteen von Andreas Friedrich Müller bi de Möhl duum|Huus in Rutenmöhl Rutenmöhl () is en lütten Oort in de Gemeen Neenkerken in’n Landkreis Heidkreis, Neddersassen. Binnen de Gemeen höört de Oort to de polietsche Oortschop Brochdörp.

Geografie

De Oort liggt in de Lümbörger Heid. Dat Water ut dat Rebeed flütt över’n Hahnenbeek na de Wiedau hen af.

De Naveröörd sünd Platenkamp in’n Noorden, Täwel un Brook in’n Noordoosten, Brochdörp un Delsen in’n Oosten, Hertel un Neenkerken in’n Süüdoosten, Drögenbossel in’n Süden, Battenbrook un Hiddingen in’n Süüdwesten, Hartböhn un Roosbrook in’n Westen un Moordörp un Söhlingen in’n Noordwesten.

Historie

De Watermöhl an’n Hahnenbeek kummt 1680 as Besitt von de Familie Mäder toeerst in de Oorkunnen vör. 1798 hett Johann Friedrich Krüdener ut Fedderlohmöhlen, de ok al de Seppenser Möhl bedreven harr, en ne’e Möhl boot, de bet in dat 20. Johrhunnert in Besitt von de Familie Krüdener bleven is.

De Oort Rutenmöhl bestünn bet an dat Enn von dat 19. Johrhunnert blots ut de Watermöhl an’n Hahnenbeek. Eerst na düsse Tied sünd dor noch tosätzliche Hööv tokamen.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Neenkerken in’n Kanton Visselhöövd höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Neenkerken in’n Kanton Wasra.

De Oort hett vör 1852 to de Amtsvaagdie Neenkerken in dat Amt Rodenborg tohöört, denn von 1852 bet 1859 to dat Amt Snevern un von 1859 bet 1885 to dat Amt Soltau. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de 2011 den Naam Landkreis Heidkreis kregen hett.

De Oort höört von öllers bi de Buurschop un later de Gemeen Brochdörp mit bi. Düsse Gemeen is an’n 1. März 1974 mit de Gemeenreform in Neddersassen Deel von de Gemeen Neenkerken worrn. Sietdem höört Rutenmöhl to de Oortschop Brochdörp, de en egen Oortsraad un Oortsbörgermeester hett.

Inwahnertall

Religion

Rutenmöhl is evangeelsch-luthersch präägt un höört to dat Kaspel von de Bartholomäus-Kark in Neenkerken.

För de Kathoolschen is de St.-Maria-von’n-hilligen-Rosenkranz-Kark in Soltau tostännig.

Siet 2013 gifft dat dicht bi Rutenmöhl ok en RuheForst.

Weertschop un Infrastruktur

För Rutenmöhl is de freewillige Füürwehr Brochdörp mit tostännig.

Verkehr

En Stück in’n Noorden von Rutenmöhl löppt de Kreisstraat 43 langs, de in’n Westen na Roosbrook an de K 223 föhrt un in’n Oosten na Brochdörp an de Bundsstraat 71. De B 71 föhrt von Brochdörp in’n Noordwesten över Täwel, Söhlingen, Hemslingen un Brookel na Rodenborg un in’n Süüdoosten över Delsen un Neenkerken na Soltau.

De nächste Autobahn is de Autobahn 7 (Afsnidd Hamborg–Hannover). De Opfohrt 45 Soltau-Süüd liggt so 21 Kilometer in’n Süüdoosten von Rutenmöhl an de B 3.

De nächste Bahnhoff is so bi 15 Kilometer wied weg in’n Süüdwesten de Bahnhoff Visselhöövd an de Bahnlien Langwedel–Ülzen. De Bahnhoff Soltau an de sülve Bahnlien liggt 16 Kilometer in’n Süüdoosten. De Bahnhoff Snevern an de Heidbahn liggt ok so 15 Kilometer in’n Noordoosten.

Von 1917 bet 1961 hett dat ok Personenverkehr op de Bahnlien Soltau-Neenkerken geven. De Bahnhoff Neenkerken weer in düsse Tied fiev Kilometer in’n Oosten.

Scholen

De Kinner ut Rutenmöhl gaht na de Grundschool Neenkerken.

Footnoten

Weblenken

Kategorie:Oort Kategorie:Landkreis Heidkreis