Aodolshüsen () is en lütten Oort in de Gemeen Blenner (Samtgemeen Thänhusen) in’n Landkreis Veern, Neddersassen.

Geografie

De Oort liggt in de Masch von de Werser, de fiev Kilometer in’n Oosten langsflütt. Dat Water ut dat Rebeed flütt över de Landwehr na de Eiter hen af.

De Naveröörd sünd Wulmsdörp in’n Noorden, Hidzdörp in’n Noordoosten, Einste in’n Oosten, Holbm in’n Süüdoosten, Nee-Holbm un Jerusalem in’n Süüdwesten un Nee Wulmsdörp un Beppen in’n Noordwesten.

Historie

Nöömt worrn is de Oort na Prinz Adolph Friedrich, en Söhn von’n hannöverschen Kurförst un brietschen König Georg III. Adolph Friedrich harr 1799 Soldaten Land geven, op dat se sik ansiedeln kunnen. Ut Dank is de Oort na em nöömt worrn.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Swarm in’n Kanton Mattfeld höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Intschen in’n Kanton Thänhusen.

De Oort hett vör 1852 to de Vaagdie Intschen in dat Amt Wessen-Thänhusen tohöört un denn von 1852 bet 1859 to dat Amt Swarm. As dat Amt Swarm 1859 oplööst worrn is, keem Holbm mit Aodolshüsen an dat Amt Veern. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort hett fröher bi de Gemeen Holbm mit bihöört, de an’n 1. Juli 1972 mit de Gemeenreform in Neddersassen Deel von de Gemeen Blenner worrn is.

Inwahnertall

Religion

Aodolshüsen is evangeelsch-luthersch präägt un höört to dat Kaspel von de Kark in Blenner.

För de Kathoolschen is de St.-Josef-Kark in Veern tostännig.

Weertschop un Infrastruktur

För Aodolshüsen is de freewillige Füürwehr Einste-Holbm mit tostännig.

Verkehr

Dicht bi Aodolshüsen löppt de Landsstraat 202 langs, de in’n Noordoosten na Blenner an de L 203 föhrt un in’n Süüdwesten na Mattfeld un Brooksen-Vilsen. In’n Westen föhrt de Kreisstraat 20 över Nee Wulmsdörp na Swarm.

De nächste Autobahn is de Autobahn 27 (Afsnidd Bremen–Wasra). De Opfohrt 24b Langwedel liggt so 14 Kilometer in’n Noordoosten von Aodolshüsen an de K 9.

De nächste Bahnhoff is so bi twölv Kilometer wied weg in’n Oosten de Bahnhoff Veern an de Bahnlien Langwedel–Bremen.

Footnoten

Kategorie:Oort Kategorie:Landkreis Veern