Stoov () is en Dörp in de Gemeen Draag (Samtgemeen Elvmasch) in’n Landkreis Horborg, Neddersassen.
Geografie
De Oort liggt direkt achter’n Diek von de Elv in de Elvmasch. Dat Water ut dat Rebeed flütt na Süden af na’n Ilau-Sneegraven.
De Naveröörd sünd Vossmoor in’n Noorden, Geesthacht in’n Noordoosten, Swinn, Rönn un Neddermeschacht in’n Süüdoosten, Krüms in’n Süden, Elvstörp un Drennhusen in’n Süüdwesten, Olengamm in’n Westen un Borghorst in’n Noordwesten.
Historie
Stoov kummt 1162 toeerst in de Oorkunnen vör.
Von 1716 bet 1965 hett dat twüschen Olengamm un Stoov en Fähr över de Elv geven.
In’n Eersten Weltkrieg sünd twee Soldaten ut Stoov fullen oder vermisst.Onlineprojekt Gefallenendenkmäler
Verwaltungsgeschicht
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Swinn in’n Kanton Addelborg höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Övermeschacht in’n Kanton Bewick.
De Oort hett vör 1885 to de Amtsvaagdie Masch in dat Amt Winsen tohöört. Na 1885 weer dat in’n Kreis Winsen. 1932 is dat Deel von’n Kreis Horborg worrn.
De Oort weer fröher en egenstännige Gemeen, de an’n 1. Juli 1972 mit de Gemeenreform in Neddersassen Deel von de Gemeen Draag worrn is.
Inwahnertall
Religion
Stoov is evangeelsch-luthersch präägt un höört to dat Kaspel von de Petri-Kark in Meschacht.
För de Kathoolschen is de Goden-Hirt-Kark in Winsen tostännig.
Kultur
En Denkmaal för de Fullenen ut de twee Weltkrieg’ steiht in Meschacht bi de Kark.
Weertschop un Infrastruktur
För Stoov is de freewillige Füürwehr Swinn/Stoov tostännig. De Füürwehr Stoov hett sik 1874 grünnt un is 1934 mit de Füürwehr in Swinn tohoopgahn.
Verkehr
Dör Stoov löppt de Landsstraat 217, de in’n Süüdwesten över Elvstörp, Drennhusen un Draag na Winsen geiht un in’n Süüdoosten na Rönn an de Bundsstraat 404 un wieder över Meschacht un Tesp na Abendörp un Addelborg. De B 404 föhrt in’n Noorden över de Elv na Geesthacht un in’n Süden na de Autobahn 39 (Afsnidd Hamborg–Lümborg).
De nächste Autobahn is de Autobahn 25 (Afsnidd Hamborg–Geesthacht). Dat Enn von düsse Autobahn liggt so söven Kilometer in’n Noorden von Stoov an de B 404 bi Geesthacht.
De nächste Bahnhoff is so bi 13 Kilometer wied weg in’n Süüdwesten de Bahnhoff Winsen an de Bahnlien Hamborg–Hannover. Op de Bahnlien Winsen–Neddermeschacht hett dat von 1912 bet 1966 Personenverkehr geven. De Bahnhoff Neddermeschacht weer in düsse Tied veer Kilometer in’n Süüdoosten.
Scholen
Stoov is een von de twee Standöörd von de Grundschool Draag.
Freetied
Twüschen Stoov un Elvstörp gifft dat twee Bootshavens un en groten Campingplatz. In’n Noordoosten liggt de Stover Strand. Bi’n Stover Strand liggt ok de Peerrennbahn, op de de Stover Rennvereen von 1874 elk Johr siet 1875 en Peerrennen afhöllt.
Footnoten
Kategorie:Oort Kategorie:Landkreis Horborg